Valentine's Day pual thisen pek

February 14-a ‘Valentine's Day’ hman thin denchhenin nimin khan DIET Serchhip-a Training mek te chuan Serchhip Blood Bank-a dah turin thisen Unit 34 an pe.
Nula leh tlangval inhmangih te ni tia sawi thin, Valentine's Day hi February 14-ah hman thin niin kumin hian Inrinni a nih avang leh damdawi In-a thawktu tam zawk te chawlh a nih avangin DIET Serchhip chuan nimin khan he ni pual hian thisen pekna hun an hawng a, District Hospital Serchhip Blood Bank-a thawktu ten Serchhip Chanmari Vengthar-a DIET Complex-ah thisen pekna hun buatsaih sakin mipa 13 leh hmeichhia 21, an vaiin mi 34 ten thisen an pe a, DIET Serchhip hian kum 2023 leh 2024-ah te pawh Valentine's Day pual hian thisen an lo pe tawh bawk a ni.

Nimin-a thisen pek a nih hma hian DIET Multipurpose Hall-ah thisen pek chungchang inzirtirna hun hman a ni a, he hunah hian AVBD Serchhip Branch President, Zonunsanga Kawlni chuan nunna chhan nana thisen pek a pawimawh zia leh thisen pe thei tura hriselna tha neih a pawi-mawh zia te a tarlang a. Serchhip Blood Bank atangin Lalhruaitluanga, Technician in thisen pe turte tena hriattur pawimawh te a sawi bawk.