Serchhip District NGOCC ten ramri hung an thlawp

Serchhip District-a tlawmngai pawl hrang hrang panga te telna, NGO Coordination Committee chuan Central sawrkar in India leh Myanmar ramri hung a tumna chu an thlawp thu an sawi.
Serchhip District NGO Coordination Committee hian nimin chawhnu khan Sub-Hqrs. YMA Hall, Serchhip-ah thutkhawm neiin India leh Myanmar ramri hung tum chungchang hi an sawiho a. Helai ramri hi Mizoram-a ruihhlo lo luhna lian tak a nih avangin kan ram leh hnam hmalam hun thui tak ngaihtuahin Central sawrkar in ramri hung a tum chu aan thlawp thu leh hung ngei se an tih thu an sawi a ni.

Nimin-a Serchhip District NGOCC thu-khawm hian District Hospital Serchhip-a Dialysis khawl bun tawh, tun thlenga la hman theih loh chungchang pawh sawihoin mipui mamawhna a san tawh avangin hman thuai a nih theihna turin thuneitute hnenah thlen nise an ti a. Thutkhawm an neih zawh hnu hian Dialysis khawl bunfel tawh hi District Medical Superintendent, Dr. ZD. Lal-muanawma hova thlirin tun thlenga hman theih ala nih loh chhan te an zawtfiah nghal a, tun dinhmun ah thawktu thenkhat ten Training an neih tawh thu leh Technician la awm lo chu harsatna ber a nih thu te an ngaithlak bawk a ni.

Hei bakah hian Serchhip District NGOCC chuan nikum August 5-a Serchhip District Jail-a Nurse sawnchhuah, tun thlenga a aiawh tur dah ala nih loh avanga harsatna te thlirin thuneitute hnenah thlen nise an ti bawk a. Serchhip-a Police indaihlohna sutkian a nih theihna turin thuneitute hnena ngen an rel bakah tuna thawk mek leh a awm ang angte pawhin thahnem ngai leh inpe lehzuala hna an thawh an beisei thu an sawi a. Zirlai ten School an kal vanglai-a lirthei leh mihring kal vel tamna zual laiah uluk zawka Traffic Police te an awm theihna turin thuneitute hnena thlen an rel bawk. Nimin-a Meeting-ah hian YMA, MUP, MHIP, MZP leh MSU hruaitute an tel a ni.