State Level Ex-Servicemen Rally hmanpuitu Larsap in Mizoram-a Ex-Servicemen te a fak

Mizoram Larsap General (Dr) Vijay Kumar Singh chuan Mizoram Ex-Servicemen League member-te chu India rama Ex-Servicemen a hmuh tawhte zinga inchei nalh leh zahawm ber an nih thu a sawi.

Inrinni khan Aizawl Lammual-ah Mizoram puma Sipai bang te intawhkhawmna, ‘State Level Ex-Servicemen Rally’ neih niin he hun a hmanpuina ah Larsap Gen. (Retd) Vijay Kumar Singh chuan ram tana Ex-Servicemen-te huaisenna, inthununna leh hnaa inpekna chu entawntlak a tih thu a sawi a. Mizoram Ex-Servicemen League member-te chu India rama Ex-Servicemen a hmuh tawhte zinga inchei nalh leh zahawm ber an nih thu sawiin, “Hei hi Ex-Servicemen-te inchei dan tura mawi leh entawntlak a ni,” a ti a. Mizo mipui leh sipai inkarah muanna, remna leh inzahtawnna a awm thu sawiin, mipuite leh sipaite'n inlaichinna tha tak an nei a, he Rally pawh hi inzahtawnna, inrinngamna, thawhhona leh induhsaktawnna lantirna a nih thu a sawi.

Larsap chuan Ex-Servicemen-te nunah mahni inphatna leh inpumpekna entirna a taka hmuh theiha a awm thu sawiin, an service chhungin chhungkaw bulah pawh awm lovin India ram hmun hrehawm tak takah te an awm kual a, anmahni avangin mipui an him thin tih a sawi a. An thatlai hun tam zawk ram tana hlantu Ex-Servicemen leh an chhungte puala Medical Camp buatsaih a ni leh pension, hamthatna leh chhawmdawlna an dawn chungchanga vuivaina thlenna tur Grievance Redressal Cell siam a ni pawh lawmawm a tih thu sawiin, rah tha a chhuah ngei a beisei thu a sawi a. Mizoram sawrkarin Ex-Servicemen leh an chhungte hamthatna a ngaih pawimawh thu a sawi bawk.

He hun hmanpuitu Home Minister K. Sapdanga pawhin ram tana inhlante leh ram zahawma siamtu Ex-Servicemen-te puala Rally neih a ni chu ropui a tih thu sawiin, anmahni avangin India chuan beiseina sang tak a nei a ni, a ti a. Ram tana an thatlai hun tam zawk hmanga ram ralti leh hrehawm tak taka awm thinte ngaihsanawm a tih thu sawiin, duty an dah pawimawh hmasa tlat thin chu fakawm a tih thu a sawi bawk.

He hunah hian Maj Gen Inderjit Singh Bhinder, Inspector General, Assam Rifles (East) chuan inlawmna thu sawiin, Ex-Servicemen (ESM) 9, sipai huaisen chawimawina dawng pakhat chhungte leh ram tana nun hlantu sipai nupui (Veer Nari) 5 te hnenah chawimawina leh tanpuina hlan a ni a, Governor-in Rally puala Stall te tlawhin Ex-Servicemen te a kawm nghal bawk.