Vawiin-ah Sawhthing man sawihona neih tum a ni

Mizoram Agriculture Marketing Board (MAMB) chu Vawiin hian an Chairman, Agriculture Minister PC. Vanlalruata hovin an thukhawm dawn a, Sawhthing leina man chungchang an sawiho dawn nia thudawn a ni.

Mizoram sawrkar chuan February 2,2026 atang khan Sawhthing lei tan turin ruahmanna a siam a. Sawhthing leina man Reserve Price atan hian kg khatah Rs. 40 atanga Rs. 45 ni turin ruahmanna a siam a, mahse sawrkarin Sawhthing man a bithlaih hi a sang nia hria in Sawhthing lei thintu (buyer) te chuan an lei ngam lo a, hei vang hian District hrang hrangah Sawhthing pawh hralh a ni hrih lo a ni.

Zalen-in Mizoram Agriculture Marketing Board hotute a biaknaah Sawhthing man bithliah (reserve price) sawrkarin a siam chu a nghet bur lo niin an sawi a. “Sawhthing rate hi kar khat chhung atan zel siam a ni a, tuna rate siam pawh hi February ni 2-7,2026 chhung atan a ni a. Rate hi kan ennawn fo dawn a, kuthnathawktu ten rate tha zawka an Sawhthing an hralh theihna atana ruahmanna hi siam a ni,” an ti a. Reserve price chu kuthnathawktute tan a ni tih sawi bawkin, “Sumdawng ten duh duha rate an control hi kan phal lo a, a hlu thei ang bera kan Sawhthing hi siam kan tum a ni,” an ti bawk.

Thudawn danin sawhthing hi West Bengal-a an hralhna hmunpui Siliguri-ah chuan a leitu Mandi ten kg khat Rs. 58 in an lei a, Assam State-ah pawh kg khat Rs. 50 in an lei mek a, hemi mil-a a hlat dan a chhutin MAMB hian Sawhthing man hi an bithliah ve leh a ni.