Serchhip atanga MCS-a tling thar lawmpui

Mizoram Civil Services (Combined Competitive) Main Examination, 2025 result chhuaka Mizoram Civil Service (MCS)-a tling Lalruatfela S/o Rohmingliana, Serchhip Bazar chu Inrinni khan Serchhip Kawnpui South Branch YMA huaihawtin khawtlang huapa lawmpuina leh chawimawina hun buatsaih a ni.
Serchhip Bazar tual-a he hun hman hi S. Kawnpui South Branch YMA Education Committee Chairman, Lalbiakdika chuan kaihruaiin Serchhip Kawnpui Village Council President Lalremsiama Kawlni, Serchhip Kawnpui South Branch YMA President C. Ramengmawia leh Serchhip Kawnpui Branch MHIP President H. Lalbiakzauvi ten thu an sawi bakah Sub-Hqrs. YMA Serchhip, Serchhip Joint VC leh tlawmngai pawl hrang hrang bakah mimal ten lawmpuina leh chawimawina thilpek an hlan bawk a ni.

Serchhip Bazar Veng-a cheng Lalruatfela hi Presbyterian English School, Serchhip atanga zirna bul tan niin Class-IX thleng a zir a, Synod HSS Aizawl atangin HSLC chu Distinction-ah a zo thung a. Army Public School, Golconda (Hyde-rabad) atangin pawl 12 chu Distinction-ah bawk zo lehin B.Sc (Hons) chu Ramjas College, Delhi University-ah a zo leh a. Kum 2022 khan UPSC Civil Service Exam hmachhawnin kum 2023 khan UPSC leh MPSC hnuaiah Civil Service a exam leh a, Prelims-ah tling ve ve in Mains Exam erawh paltlang zo lo a. Kum 2024 atang khan Mizoram Youth Commission (MYC) leh MS Academy Khatla-ah Faculty Member hna thawk chungin MCS Exam turin a inbuatsaih leh a, kum 2025 khan Exam lehin Prelims leh Mains Exam te a paltlang hnuah Interview paltlang lehin MCS lak thar zingah tlingin 8-na a ni phak a ni. Tun tumah hian Serchhip District atangin amah chiah hi MCS-ah tling awmin MPS-ah erawh tling pahnih an awm a ni.

Inrinni-a amah chawimawina hunah hian mi thahnem tak telin zirna kawng a zawh dan amah hian a sawi bawk a ni.