Kawlchaw-a dah tur Buhfai phurtu chesual ah driver thi

Nimin khan Chhingchhip dai-ah Buhfai phur truck pakhat chesualin kawngthlang ah a tlan-liam a, he Motor khalhtu Gospel Lalhmingthanga chu vanduaina thlenna hmunah a boral.
Thudawn danin nimin chhun dar 11:30 vel khan Chhing-chhip atanga Serchhip lam kawng KM khat vela hlaah buhfai phur Truck (Mz-01Q/1487) chu chesualin kawngthlang ah a tlanliam a, he Motor hian Kawlchaw-a dah tur buhfai phurin a khalhtu Gospel Lalhmingthanga, (32), Phullen chauh chuangin vanduaina thlenna hmun ah hian a boral nghal a ni. He Motor hi nimin khan Aizawl lam atanga rawn chhoin an thiante khalh Motor dang nen an inzui a, he Motor-ah hian a khalhtu chauh a chuan avangin vanduaina thlen chhan hi chiang taka hriat theih a ni lo a, kawngsir-a parapet chu su chhiain meter 100 vel a lum a ni.

Thudawn danin Gospel Lalhmingthanga hi hun engemaw chen nupui fanau nei-a Chhingchhip-a lo khawsa tawh niin a nupui nen hian an awm hran hnuah Phullen lamah hian a khawsa zui ta a. Vanduaina thlenna hmunah hian Serchhip Police te pawh kalin thil tihfel ngai te tihfel a nih hnuah Gospel Lalhmingthanga ruang hi Postmortem a nih hnuah Vawiin hian Phullen-ah vuiliam tura ruahman a ni.