Sawrkar kum thar ah Police 200 lak leh tum a ni

Home Minister K. Sapdanga chuan sawrkar kum thar ah Police 200 lak tum a nih thu sawiin, “A hmaa Police kan lak dan ang bawk khan dik takin kan la leh dawn,” a ti.

ZPM chuan nimin khan Aizawl-a an Party Office-ah Chhung Inkhawm neiin he hunah hian Home Minister K. Sapdanga chuan kum 2021 atangin kumtin Police boral za chuang an awm thin thu leh kumtin mi 150 vel bawr pension an awm ziah bawk thu sawiin, “Post ruak 4,666 a awm ta mek a, tunah hian training mek 250 an awm a, Financial Year tharah Police 200 lak leh tum a ni,” a ti a. “A hmaa Police kan lak dan ang bawk khan dik takin kan la leh dawn a, thalaite lo inring rawh u,” a ti a, “Kum 2025 kha Police-te chuan fitness uar kumah kan hmang a, kum 2026 hi Discipline uar kumah kan puang ve leh thung. Police-ah chuan posting duhna hmun dil a awm ve lova, a hun takah leh a hmun dik takah engkim tih vek tum a ni,” a ti bawk.

ZPM chuan Kuhva Smuggling an do thu pawh Home Minister chuan sawiin, “Eptuten min do ve thung hi a pawi hle. Politician inrawlhte mipuiin an hnawl a, Police inrawlhte pawh an pension zel a ni. Kum hnih chhungin Hachhek Bial in a rah an tel a, chu chu ram mipuiten kan hria a ni. Kan sorkar chuan kuhva smuggling hi kan khap zel dawn a, Service lai an ni emaw, Civil mi an ni emaw, inhnamhnawih an awm chuan kan dim dawn lo,” a ti a. Ruihhlo ngaite nasa zawka kan buaipui a ngai tih sawiin, “YMA kumpuan ‘Ruihhlo do’ hi a fuhin a hun a dik tak zet a ni. Home leh Excise Department bakah YMA-te nena Operation Jeriko chak zawka kalpui tum a ni a, Hulhliap Short Stay, TBCC leh Operation Kingdom Ministry-te hi an hlu takzet a ni,” a ti bawk.

UD&PA Minister ni bawk K. Sapdanga chuan Thenzawl Peace City chungchang sawiin, “DPR siam mek a ni a, chak taka hna kalpui tum a ni. Aizawl khawpui sawn tumna a ni lova, Aizawl khawpui tawt lutuk tih ziaawmna tura ruahman niin; a thawh khat nan mi nuai khat chen theihna turin ruahman chin phawt a ni,” a ti. Khawpui chhung kawng siam mek leh AR ram chhuahsan chungchang sawiin, “Vantlang tana tangkaia siam a ni dawn a, a zau thei ang ber hmun hringa siam kan tum a, a zau thei ang ber kawngpui siam kan tum a, kan tualchaina ber Lammual-ah pawh phul thar tha chi phah tum a ni. A ngil thei ang berin Lamlian meter 14-a zau sial tum a ni a, Dak Inpui atanga Saron Veng panna kawng meter 7-a zau laih tum a ni. Parking Lot lian, motor sang chuang dah theihna tur te, Convention Centre mi 4,000 chuang lenna tur ruahman mek a ni bawk. Bazar Bungkawn-ah Aizawl Square (Island) siam tum a ni a, Assam Rifle Mandir pawh zau zawka la hekin kawng sial a ni ang a, a chungah Public Park siam tum a ni,” a ti bawk.