Mizoram Entrepreneurs' Chamber din a ni

Mizoram-a Entrepreneur lam buaipuia kalpui mekte chuan Mizoram tana hmasawnna a kal theih nan ‘Mizoram Entrepreneurs' Chamber’ (MEC) an din a. MEC hruaitute hian nimin khan an Chairman, Joseph L. Ralte (MFPRTC) leh General Secretary, Dr. Vanlalsiama Chhangte te hova thuthar thehdarhturte kawmin Entrepreneur tihchangtlunna atan leh sawrkarin hma a lak duh chuan theihtawpa thlawh an inhuam thu an sawi.
Nimin-a Aizawl Press Club-a thuthar thehdarhtute an kawmna ah hian MEC hruaitute chuan khawvel khawi ram leh state economy chawikanna atana kawng pawimawh ber pakhat chu mahni kutkawih eizawnna (entrepreneurship) chawikan a nih thu sawiin, India sawrkar chuan Entrepreneurship Development lamah hian tan a la nasa in Policy tha siam mai duhtawk lovin a Implementation lamah pawh hma an la nasa hle tih an sawi a. Private Sector lam atanga sawrkar tha tichak turin Entrepreneur rualte chuan ‘Mizoram Entrepreneurs' Chamber’ (MEC)  pawl chu December ni 30, 2025 khan an din thu an sawi a, tun dinhmunah Private firm hlun leh rintlak tak tak member 43 zet an awm thu an sawi bawk.

MEC hruaitute hian Mizoram tana pawimawh leh an vei zawngte sawiin finchhuahtu nih an tum thu an sawi a, “Kan ram hmasawnna tur khawlpui (engine of growth) chu entrepreneurship hi a ni a. Chu khawlpui tivir tur chuan Department ten engkim tih tum lo se. Policy leh Fund an chhawpchhuak ang a. Mipuite tan facilitator an ni anga, keini Entrepreneur te'n khelmual zauva Footballer te'n Football an khel ang hian hmalam pan turin kan khel anga. Sawrkar hna chauhva innghat lovin Private Sector a lo thanglian ang a. Kan thalai hna hmu lo te'n mumal takin eizawnna an lo nei thei dawn a ni,” an ti a. Entrepreneurs lam hawi a tul hrang hrang atan mumal taka budget-ah sum daha hma la tura sawrkar ngenin, Planning & Programe Implementation hnuaia Science & Technology awm mek chu Department-ah hlankai nise, hei hian Entrepreneurs lama hmalakna pawh a tichak lehzual ngeia an rin thu an sawi bawk.