Mizoram-ah Kangmei Ven Hapta hawnna neiin Serchhip-ah chuan naktuk-ah hawn a ni ang

Nimin atang khan Mizoram pumah Kangmei Ven Hapta, Fire Prevention Week 2026 chu hman tan niin Aizawl-ah chuan Environment, Forest & Climate Change (EF&CC) Department changtu Minister Lalthansanga chuan he Hapta hi a hawng a ni.

ATI Auditorium-a Kangmei Ven Hapta hawnna hunah hian EF&CC Minister Lalthansanga chuan 'Kangmei Ven Hapta 2026' chu mipuite’n kangmei laka fimkhur nachang kan hriat thar leh theuhna tur atan te, uar lehzuala invenna kalpui a nih theih nan te a hmalakna a nih thu a sawi a. “Record-a tarlan a nih danin Mizoram chu engtiklai pawha ram kang/kangmei chhuah thut theihna hmun a nih avangin kumtluana kangmei laka fimkhur nachang kan hriat reng a ngai a ni,” a ti a. Kangmei laka ramngawte venghim tur leh sik leh sa inthlak danglam nasa lutuk tur veng turin mipuite’n inzirtirna kan neih nasat a ngaih thu sawiin, khawpuia chengte chu hma la hmasatu ah tang se a duh thu a sawi a. Sawrkar pawhin Media hrang hrang kaltlanga uar lehzuala hmalak zel a tum thu sawiin, kangmei venna kawnga thawk tha khuate hnenah pawh lawmman siam a nih leh tur thu a sawi bawk.

Environment, Forest & Climate Change Department bultuma kumin a Kangmei Ven Hapta-ah hian thupui atan ‘Nungcha tinreng chenna leh tui thianghlim min petu ramngawte, kangmei lakah venghim rawh’ tih chu hman a ni a, a hawnna inkhawmah hian Additional Principal Chief Conservator of Forests (Planning) Ravi Horo chuan inlawmna thu a sawi a; Principal Chief Conservator of Forests Rajeev Kumar Tiwari chuan Fire Prevention Week thil tum tlangpuite a sawi bawk a; Pollution Control Board Chairman Liankima Lailung kaihruaiin nungcha leh ramngaw humhalh tura thutiam lakna neih ni bawkin Department hrang hrang aiawhte bakah Environmental NGO leh YMA hruaitute he hunah hian an tel a ni.

Kangmei Ven Hapta 2026 hi February ni 9 atanga February ni 13 thleng hman tura ruahman a ni a, kangmei venna kawnga hma la tha zual khaw pathumte hnenah lawmman pek an ni ang a, khaw dang titha pathumte hnenah Consolation Prize pek an ni bawk ang. Huan emaw, leipui emaw tur atana mimal ram vat te chuan March ni 5, 2026 ralhmain an hal tur niin khawtlang theh ram neitute chuan March ni 15 ralhmain an Lo te chu an hal tur a ni thung a. Lengpui leh a chhehvela Lo hal turte chuan tlai lama Thlawhtheihna thlawkchhuak leh tum hnuhnung ber hnuah hal tur a ni ang.

Nimin vek khan Mizoram District hrang hrangah pawh Kangmei Ven Hapta hawnna hi neih a ni a, Serchhip-ah chuan naktuk khian he Hapta hawnna Inkhawm hi neih a ni dawn thung a ni.