Sawrkar in Sawhthing lei tan a tum ni ah Buyer awm loh vangin lei tan theih a ni lo
Tarlan tawh angin sawrkar ruahman dan chuan nimin atang khan Mizoram puma Sawhthing lei tan tur niin District hrang hranga a buaipuitu District Agriculture Marketing Committee (DAMC) te ruahmanna-in Primary Collection Centre (PCC) leh Secondary Collection Centre (SCC) kaltlangin lei tum a ni a, hetihlai hian Mizoram sawrkarin Sawhthing hralhchhuah phalna man a bituk, Reserve Price chu kg khat zelah Rs. 40 atanga 45 inkar a ni a, Reserve Price hi a san avangin buyer an awm mai lova, hriat theih chinah nimin khan Mizoram District hrang hrangah Sawhthing hralh a ni lova, Serchhip District-ah chuan Rs. 44/- a Tender tihchhuah niin chhangtu an la awm loh avangin Sawhthing lak a la ni lova, Khawzawl District leh Vairengte-ah chuan Secondary Collection Center (SCC) ah Sawhthing lakkhawm tan a la ni lo a, Tender notice pawh chhuah a la ni lova. Saitual District leh Hnahthial District-ah pawh SCC kaltlang a hralh an la awm lova, Champhai District-ah pawh Sawhthing leitu tur chu SCC ten an la zawng kual mek chauh tih Champhai DC, DAMC Chairman ni bawk Mohammad Aaquib chuan a sawi a, Aizawl Addl. Deputy Commissioner Zoramsiama Hmar pawhin Aizawl District chhungah nimin khan buyer an la awm lova, Sawhthing cho lawk an awm lo bawk tih a sawi a ni.
Akashvani News zawhna chhangin MAMB Co-Chairman Dr. KC. Lalmalsawmzauva chuan Reserve Rate an siam chhin hi Mandi pahnih- Mizorama sawhthing thlen thlakna West Bengal-a Siligur Mandi leh Asia rama Sawhthing Mandi lian ber- Azadpur Mandi, Delhi-a Sawhthing rate te tinzawnin Mizoram-a Sawhthing Reserve Price hi an siam tih a sawi a, nimin khan Siligur Mandi Sawhthing rate chu kg 1-ah Rs. 58 a ni a, Azadpur Mandi-ah Sawhthing kg 1 chu Rs. 55 man vel bawr a nih bawk avangin Mizoram-a Reserve Price pawh hi a san phah tih a sawi a, ruahman lawk ang chuan Reserve Price hi chawlhkar khat zel kalpui tum a ni a, thil thlen dan chu an thlir reng a, a boruak a zirin a tul angin hma an la zel dawn tih a sawi a ni.
Hetihlai hian mimal sumdawng State danga thawnchhuak thin te chuan Mizoram khaw thenkhatah Mizoram sawrkar kaltlang ni lo, direct-in Sawhthing chu kg 1-ah Rs. 27 atanga Rs. 30 inkarin an lei ve mek bawk a, tun dinhmunah Mizoram thenawm Guwahati leh Bagha Sawhthing rate chu kg 1-ah Rs. 35 atanga Rs. 37 vel a nih bawk avangin hemi chungchang hrechiangtute chuan hmarchhak State dang a Sawhthing market rate a san loh laia Mizoram Reserve Price tihsan reng a nih chuan Mizorama loneitute tharchhuah Sawhthing chu an tiral thei lovang tih hlauhthawnawm an tih thu an sawi a ni.