Sawhthing lei duh la awm rih lo; Nimin-ah Hmunphiah buk tan a ni thung

Mizoram sawrkar in kumin a Sawhthing man tur a bithliah angin nimin thleng khan Sawhthing lei ngam an la awm rih lo a, hetihlai hian Mizoram sawrkar ruahman angin nimin khan Mizoram hmun thenkhat ah Hmunphiah ro hralh tan a ni thung.
Mizoram sawrkar ruahman anga kumin-a thlai thlanbik pali - Sawhthing, Hmunphiah, Aieng leh Hmarchate te tunkar Thawhtanni atanga lei tan tum ni mah se Sawhthing chu sawrkar in kumin-a Reserve Price a ruahman anga lei ngam an la awm loh avangin hralh theih ala ni lo a, Sawhthing hi a chingtu ten man man zawk leh rate inang tlanga an hralh theih nan Mizoram Agricultural Marketing Board (MAMB) in Vairengte atanga a hlat zawng tehin a leitu tur ten an leina tur man hniam ber (minimum rate) leh a sang ber (maximum rate) a bituk a, hemi ang hian Sawhthing hi a sang berah kg khat Rs. 45 leh a hniam berah kg khat Rs. 40 niin nimin thleng khan buyer zingah lei ngam an la awm lo a ni.

MAMB Co-Chairman leh Adviser to Chief Minister (Handholding) Dr. KC. Lalmalsawmzauva chuan tunah hian Sawhthing hi a rate awm lo a ni lo tih sawiin, kg khat Rs. 31 leh 32-a lei duh an awm reng tih sawiin, Mizoram Sawhthing chu State dang thar aia a quality a that zawk avangin a tir atanga man tlawm zawka hralh ringawt chu tha an tih loh avangin Reserve Price an bituk hi an tisang lui tih a sawi a. Kumin hian Sawhthing hralh chungchang ah awmze nei deuh zawka kal an tum thu leh a man pawh thunun an tum tih sawiin, Sawhthing-a Reserve Price ngaihtuah hian tunkar-ah an thutkhawm dawn thu leh Sawrkar in Reserve Price a tihniam chung pawha leitu tur an awm loh chuan sawrkar in a intiam angin kg khat Rs. 50/- in an la dawn tih a sawi bawk.

Hetihlai hian Hmunphiah ro chu nimin khan Mizoram hmun thenkhat ah hralh tan a ni a, sawrkar rate bituk ang chuan Hmunphiah ro hi kg khat Rs. 80 a hralh tur niin Sakawrdai, Marpara leh Vairengte-ah te chuan kg khat Rs. 100/- a buk tan a ni.