India rama Health Care System tha ber pawl MUHCS an duangchhuak tih CM in a sawi

Chief Minister Lalduhoma chuan Mizoram sawrkar in India rama Health Care System tha ber pawl Mizoram Universal Health Care Scheme (MUHCS) a duang chhuak tih a sawi.

Nimin khan Aizawl-a Falkland Park-ah ni hnih awh tur Health & Family Welfare Department hnuaia Mizoram Health Systems Strengthening Project buatsaih Knowledge Exchange Health Conclave neih hawngin Chief Minister Lalduhoma chuan Mizoram sawrkar in mipuite hriselna chu ram hmasawnna zelna atana thil pawimawh tih a hriat avangin mipuite hriselna lamah nasa takin hma a lak thu leh India rama Health Care System tha ber pawl, Mizoram Universal Health Care Scheme a duanchhuah thu a sawi a. Empanelled Hospital kaltlangin Cashless-in damlote chu enkawl an nih thu sawiin, “Kan hriselna hmunhmate nasa takin kan thuam tha a, District Hospital te, CHC leh PHC te kan thuam tha a. Kan thawktute tan khawl changkang tak tak kan lei a, hriselna lamah hmasawnna thar kan thawk nasa hle,” a ti a. Heng hmalakna tam takte hi Mizoram Health Systems Strengthening Project kaltlanga an thawh te a nih thu sawiin, “He hmalakna kan neih theihna bul World Bank chungah leh Central sawrkar chungah kan lawm hle,” a ti bawk.

Chief Minister chuan India ram State hrang hrang atanga mipui hriselna lama mithiam lo kalkhawmte nen Knowledge Exchange an nei dawn tih sawiin, “He Conclave zarah hian hmalakna tur tha zawk leh hriatna zau zawk kan neih kan beisei a, India ram tana kan thawhhonaah te, hma thar kan lak zelna atan te a tangkai dawn a. Hlawk taka hman kan tum theuh dawn nia,” tiin Conclave buatsaihtu MHSSP chungah lawmthu a sawi a. Coffee Table Book a tlangzarh nghal bawk.

Mizoram Health Systems Strengthening Projects hi World Bank sum hmangin kum 2021 khan kalpui tan a ni a. Kum nga (5) chhung kalpui tur a nih angin kumin March thlaah hian a tawp tawh dawn a. Nimin-a he hun hman ah hian MHSSP Project Director, Dr. Lily Chhakchhuak chuan an hnathawh dan tlangpui a sawi a. Project cost hi cheng vbc. 280 a ni a, kumin January thla khan Project Development Objectives panga (5) zinga pali (4) chu an tihlawhtling fel a, Intermediate Result Indicators target 16 zinga 14 an hlen tawh bawk a. Target hmabak la awm te chu kumin March thla ral hmaa hlen vek an inbeisei. An hmalak zinga langsar ber pakhat chu March 2025-a Mizoram Universal Health Care Scheme tlangzarh kha niin MUHCS hnuaia Enrolment target chu zaa 91 an tihlawhtling a. Hna an thawh that avangin National Health Authority chuan tun January thla khan Best Performance in Achieving Card Saturation lawmman a rawn hlan a ni.

Nimin-a he hun hman ah hian Health Minister Lalrinpuii pawhin thu sawiin, Telanagana, Meghalaya, Nagaland, West Bengal, Assam, Tamil Nadu, Gujarat, Sikkim, Arunachal Pradesh aiawh mithiamte bakah Gates Foundation leh NEC aiawhte an rawn tel a ni.