Sawhthing hralhna tihniam

Mizoram Agricultural Marketing Board (MAMB) chuan tunkar chhung atana sumdawng ten kuthnathawktute Sawhthing an leina man hniam ber tur a bituk thar a, Sawhthing hi kg khat Rs. 30-35 inkarah tihhniam niin MAMB hotute chuan Sawhthing rate thar ang hian kuthnathawktu ten Sawhthing an hralh theih an beisei thu an sawi.
Agriculture Minister kaihhruai MAMB hian kar kalta chhung atan Sawhthing man chu Rs. 40-45 inkarah a bituk a, sumdawng zingah lei ngam an awm mumal loh avangin MAMB chuan tunkar chhung atan Sawhthing man hi a bituk thar a, kar hmasaa Sawhthing man aiin chawhrualin Rs. 10 ang zelin SCC tinah a hniam a ni.

MAMB thukhawm hian sumdawngten Sawhthing an leina tur zat sawrkarin a bituk nan hian Siligury-a Sawhthing man zat leh Siligury-a Sawhthing phurh thlenna man zat te chu a hmang ber a, kuthnathawktute tana hlawk tur siin a man hniam ber tur a bituk a ni. MAMB hian kumin atan District hrang hrangah Sawhthing lei/hralhna hmun Secondary Collection Centre (SCC) 64 a siam a; sawrkar ruahman dan chuan SCC tina sum-dawngten Sawhthing an leina man hniam ber (reserved price/floor price) tur chu India ram hmun hrang hranga Wholesale market (Mandi) rate enchungin kartin emaw, a tul ang zelin a bituk dawn a. Tunkar chhunga SCC 64-a sumdawng ten Sawhthing an leina man sang ber atan kg khat Rs 35 a ruahman a, a hniam ber chu kg khat Rs. 30 a ni a; Laboratory-a enfiah a nih hnua Sawh-thing quality tha leh chemical tel loa enkawl (Organic)-te chu a man a sang bik a, Entry Point  Vairengte atanga SSC hlat zawng pawhin nghawng a nei bawk.

Hetihlai hian MAMB hruaitute chuan tunlai hian sawrkar rate anga hralh tuma Myanmar atanga Sawhthing lalut an awm nia an hriat thu sawiin, diklo taka ti lo turin mipuite an ngen a ni.