Sairang leh Silchar inkara Rel service hawngin Chief Minister leh Union Minister in an vailiam nghal

Sairang leh Silchar inkar Rel service thar leh Guwahati Rel Station-a Blended Hospitality Service te chu nimin khan Union Railway Minister, Ashwini Vaishnaw chuan Guwahati atangin a hawng a, Chief Minister Lalduhoma leh Union Railway Minister Ashwini Vaishnaw te hian Sairang - Silchar Rel Service thar hi an vailiam nghal a ni.

Sairang leh Silchar inkar Rel service thar leh Guwahati Rel Station-a Blended Hospitality Service thar hawnna Guwahati-a neih a nih rual hian Sairang Rel Station-ah hemi pual hian hun lo hman niin he hunah hian Chief Minister Lalduhoma chuan Sairang leh Silchar inkar Rel tlantir tura an dilna an tihhlawhtlinsak avangin Union Railway Minister Ashwini Vaishnaw chungah lawmthu sawiin, “Silchar hi kan thenawm khawpui pakhat a ni satliah lova, economic lama kan kawngpui pawimawh a nih avangin he Rel Service hi kan economy chuan a thatpui dawn a ni,” a ti a. Thla nga liam ta mai khan Sairang Rel Station chu hawn a nih thu leh hawn a nih atanga hun reilote chhungin a tihchangtlunna hna tam tak thawh a lo ni leh tawh tih sawiin, “Railways hmalakna hian fak a phu a, a bik takin NF Railway Lumding Division te chungah lawmthu ka sawi a ni,” a ti bawk.

Chief Minister chuan Prime Minister Narendra Modi kaihhruaina hnuaia Act East hmalakna zarah Mizoram leh hmarchhak Bial te chu ram hmasawnna lana hmun pawimawhah a chang chho mek tih pawh sawiin, Hmun kilkhawr zawka ngaih thinte chuan inkalpawhna tha zawk an nei chho mek tih a sawi a. “Vawiina kan hawn thar Sairang leh Silchar Rel service hi chung zinga pakhat chu a ni. He Rel Service thar hian Assam nena kan inpawhna a ti tha lehzual ang a, Sawhthing leh thlai dang kan tharchhuahte hralhna tur zau zawk min hawnsak ang a, kan flagship scheme Bana Kaih hi a ti chak dawn a ni,” a ti a. Handholding Scheme ti chak leh zualtu ah leh Mizoram loneitute tan Sairang Station-a Warehouse sak a tul thu te, Thenzawl Peace City thlenga Rel kawng kalna tur tihfel thuai a tul thu te pawh Chief Minister chuan sawiin, Delhi – Silchar Rajdhani Express chu Delhi – Sairang ni tura tihsei (Extension) tul a tih thu a tarlang bawk.

He hunah hian Bialtu MLA leh Adviser to Chief Minister TBC. Lalvenchhunga pawhin thu sawiin Chief Minister Lalduhoma leh Railway Minister Ashwini Vaishnaw te hian Sairang – Silchar Rel Service thar No. 05679 hi an vailiam a, Sairang leh Silchar inkara passenger phur Rel service tur hi Silchar atangin Thawhlehni, Nilaini, Zirtawpni, Inrinni leh Pathianni-ah te zing dar 7:00-ah a chhuak thin dawn a; chhun dar 12:30-ah Sairang Station thleng tura ruahman a ni a. Sairang atangin kartin Thawhtanni, Thawhlehni, Ningani, Zirtawpni leh Inrinni-ah Silchar panin a service dawn a, chhun dar 1:00-ah chhuakin zan dar 6:30-ah Silchar Station  thleng tura ruahman a ni bawk.

Sairang leh Silchar inkara Rel Service thar tur vailiam a nih hnu hian Chief Minister Lalduhoma hian a ngenna anga World Class Rel Station-a Sairang Rel Station siam tura tihfel tak design a en a. Railways thawktute chuan an hmalakna tlangpui lo hrilhin, hnathawhna tur cheng vbc. 97 sanction a nih thute, Tender an tihchhuah tawh thute leh Tender hi thla thar March, 2026 thlatir lama hawn an tum thu an hrilh a ni.