SAGY-a Project la zawh loh 80 paihin zawhfel a ni

State Level Empowered Committee (SLEC) thukhawm chuan Sansaad Adarsh Gram Yojana (SAGY) hnuaia project la zawh loh 80 te chu paih turin an rel.

Nimin khan Chief Secretary Khilli Ram Meena hovin State Level Empowered Committee (SLEC) MINECO-a Conference Hall No. 1-ah thukhawmin Sansaad Adarsh Gram Yojana (SAGY) hnuaia hmalakna te an thlirho a. SAGY hi thingtlang khuate tihhmasawnna tura kum 2014 October thla atanga India sawrkar laipuiin a kalpui niin he Scheme hnuaiah hian Member of Parliament (MP)-te’n thingtlang khua an thlanchhuaha hmasawnna ruhrel huap zau tak – khawtlang tan, hnam tan leh ram hausakna tihchangtlun nan mawhphurhna an la a. Kum 2016 thleng khan MP tinin Gram Panchayat (Village) pakhat a thlang a, khaw entawntlak (Model Village)-ah an chhuah a. Kum 2019 thleng khan MP tinin khaw pahnih dang an enkawl leh a, kum 2024 thlengin kumtin khaw pakhat an enkawl bawk a ni.

SAGY hi Mizoram-ah pawh kum 2014 atang khan hman tan niin MP-te’n Gram Panchayat (GP) 14 chu Adarsh Gram (Model Village) atan an thlangchhuak a. GP tinte’n vantlang mipuite rawnin Village Development Plan an siam a. A vaiin VDP hnuaiah project 816 awmin, hmasawnna thlur hrang hrang – Infrastructure, Education, Health, Livelihood, Sanitation leh Social Inclusion-te a huam a. He’ng project 816 zinga 736-te chu hlawhtling taka zawh a ni tawh a. A tirah chuan kum 2024 hma ngeia project zawng zawng zawh tum a ni a. Amaherawhchu, hemi hun chhung hian harsatna hrang hrang avangin project thenkhat chu zawh theih a ni ta lo a. Heti chung hian Mizoram-a SAGY kalpui dan chuan hmasawnna awmze nei tak leh ‘holistic rural development’ ngaih pawimawhna lian tak a awm tih a lantir a. Khumtung, Mualcheng, Muthi leh Dam-parengpui-ah phei chuan project zawng zawng zawhfel a ni.

Ministry of Rural Development, SAGY Division chuan August ni 7, 2023 khan SAGY portal-a VDP hnuaia project paih phalna a pe a. Gram Sabha, District Level Committee (DLC) leh State Level Executive Committee (SLEC)-te remtihna lak hmasak a ngai thung a. Mizorama SAGY khaw hrang hranga Charge Officer-te chuan Gram Sabha leh DLC atangte hian remtihna lain nimin-a SLEC-in project 80 paih a rel takah hian Ministry-in July ni 31, 2025 hmaa SAGY hnuaia project-te zofel tura thu a pek zawmin Mizoram chuan SAGY hmalaknate kim tak leh hlawhtling takin a khar thei dawn a ni.

Heng Project zawh ala nih loh chhan hi a tira tum san lutuk avang te, Departmental scheme lama harsatna a awm avang leh Sum lama harsatna a awm vang te a ni a. SAGY hian budget hran a nei lo a, chu vang chuan VDP hnuaia project tam takte chu tan emaw, zawh an ni thei ta lo a ni.