International Conference nei

Ni hnih (2) chhung awh tur ‘International Conference on Recent Advances in Environmental Research, Biodiversity Conservation and Sustainable Development’ chu nimin khan neih tan niin PWD Minister Vanlalhlana leh Education Minister Dr. Vanlalthlana te chuan he hun hi an hmanpui a ni.

Pachhunga University College-a Department of Environmental Science leh Society for Agro-Environmental Sustainability, Dehradun, Uttarakhand te tangkawpin PUC Auditorium-a he hun an buatsaih ah hian khuallian PWD Minister Vanlalhlana chuan ramngaw leh nungcha tih chereu nasat avangte leh sik leh sa inthlak danglam nasat avangte a harsatna hrang hrangte hian khawvel a nghawng ni mai lovin, khawtlang nun, eizawnna leh thangthar lo la awm leh zel turte thleng tan a chhe zawnga nghawng tha lo nei thei a nih avangin ram hmasawnna hna thawh leh environment humhalhte hi inkhuangrual taka, fimkhur taka kalpui a ngaih thu a sawi a. Inkhuangrual taka development leh environmental conservation te hi kalpui a nih zel theih nan thawhho a pawimawh thu te a sawi bawk.

He hunah hian Khualzahawm Minister Dr. Vanlalthlana pawhin tun chhuante chauh ni lo, chhuan lo la awm lehzel turte tana chenna tlak ram nuam leh hrisel nei turin zirlaite leh hma-sawnna hna duangtu ten tangruala, uar lehzuala zirbingna kalpui deuh deuh a ngaih thu a sawi a. Environment humhalh kawnga sawrkar hmalakna hrang hrangte sawiin, Mizoram-a zirna kalphung pawh tha lehzuala kalpui a nih theih nan hmalak mek a nih thu a sawi bawk.

He International Conference hi online leh offline mode-a kalpui niin Mizoram mai bakah ram pawn atangte in zirlai leh mi thiam rualte’n Environment, Biodiversity leh Sustainable Development chungchanga thupui chi hrang hrang thlanchhuahte hmangin, thu sawi leh  zawhna leh chhan hunte an hmang ho dawn a ni.