Mizoram Universal Health Care Scheme hnuaiah Sawrkar kumthar atan inziahluh theih dawn

Mizoram Universal Health Care Scheme (MUHCS) policy kal lai chu kumin March ni 31-ah a tawp dawn avangin inziahluhna hun hawn tan a ni leh dawn ta a, April ni 15, 2025 thleng MUHCS 2.0-a inziah luhna hun hawn tur niin March 1 atangin offline-a inziahluhna hun hawn leh tura ruahman a ni.
Damloh nikhuaa mahni insengso lo a inenkawlna Scheme, Mizoram Universal Health Care Scheme (MUHCS) Policy kalmek chu kumin March ni 31 hian a tawp dawn avangin Mizoram Sawrkar chuan MUHCS 2.0 (2026-27) policy-a mipui nawlpui (General beneficiary) tan Vawiin, February ni 16 atanga kumin April ni 15 thleng online-a inziahluhna hun a hawng leh dawn a. MUHCS CEO Dr. Lalhriatzuali’n hemi chungchanga mipui hriat tur tul a sawina-ah tuna inziahluhna runpui hawn tur hi April ni 1,2026 atanga hman tan tur a nih dawn thu leh Inziahluh hun hi April ni 15 thleng hawn a ni dawn tih a sawi a. Inziahluhna hi online-a kalpui hmasak tur a ni a, mahni awmhmun atangin inziahluh theih a ni dawn a, inziaklut duh tan http://muhcs.mizoram.gov.in/ atangin inziahluh theih a ni dawn a. Online-a inziaklut thei lo te tan bik kumin March ni 1 atangin Offline-a inziahluh theihna hun hawn a ni dawn bawk a, hei hi online a inziahluh remchan lohna hmunah chauh kalpui tura ruahman a ni.

MUHCS 2.0-ah mipui nawlpui (General beneficiary) tana inziahluh man hi duh thlan tur chi tum a awm a, Rs. 2,500 a inziaklutte tan an damlohin General Ward-ah admit an ni anga, Rs. 5,000 pe te chu Semi-Cabin leh Rs. 10,000 pe te chu Cabin-ah an awm thei ang a. Sawrkar hnathawk, Civil Pensioner leh AB-PMJY Golden Card hmangtu chhungkaw tan General Beneficiary hnuaiah hian inziahluh hranpa a ngai ve dawn lo a ni.

Health Minister, Lalrinpuii chuan heng inziahluh hun biktuka inziaklut hman lo tan kumin June thlaa chhungin Grace Peroid hawn a ni dawn a, heta inziaklutte erawhin inziahluh hun pangngaia inziahluh man zaa 50-in an chawi tam a ngai thung dawn tih a sawi a ni.