Mission Organic Mizoram hnuaiah thlai thawnchhuak

Ei leh bar-a Mizoram a intodelh tur leh kuthnathawktuten awlsam zawka thlai tharchhuah sa an hralh theih nana hma latu Mission Organic Mizoram hnuaiah thlai tharchhuah tam tham tak chu ram pawnah thawnchhuah a ni.

Mission Organic Mizoram tarlan danin sawrkar kum kalta ah khan Sawhthing Metric tonne 20 leh Hmarchate metric tonne 10 bakah Lakhuihthei metric tonne 4.2 chu rampawnah thawnchhuah a ni a, heng bakah hian Millenium Centre tualzawl-ah Pineapple Bonanza an buatsaih atangin Lakhuithei metric tonne 9 hralh a ni bawk.

Mission Organic Mizoram thawktute sawi danin kuminah pawh hmasawnna an hmuh chhunzawm zel a, thla liam ta January chhung khan Lakhuihthei metric tonne 32 chu Guwahati ah thawnchhuah a nih thu an sawi a, Mizo Hmarcha metric tonne 4.5 pawh Tripura-ah thawnchhuah niin Mizo Hmarcha ro metric tonne 2.5 chu tualchhungah hralhchhuah anih thu an sawi bawk a. Mission Organic Mizoram hnuaiah hian kuthnathawktu 27604 an inziak lut tawh a, Hectare 26,500-ah kuthnathawktu ten thlai hrang hrang an ching thin a ni. Mission Organic Mizoram hi kum 2016 khan Mizoram-ah bultan niin an thawhpui Service Provider te nen Mizoram District hrang hrangah kuthnathawktute hmasawn nan hna an thawk thin a ni.