Eng la luh lohna khua te Eng pe turin hma la

Tun thlenga Eng (kawlphetha) la luh lohna khua ten kawlphetha an dawn theih nan hmalakna kalpui tan a ni.

Sawrkar laipuia Ministry of Power-in Revamped Distribution Sector Scheme (RDSS) a duan hnuaiah tun thlenga kawlphetha la dawng ve lo Mizoram a khaw 29-ten Eng an neih theih nan Rural Electrification chu kalpui tan a ni dawn a, a bultan nan Lunglei Power Circle Superintending Engineer H. Zonunsanga hovin Lunglei leh Lungsen bakah Tlabung-a Power & Electricity Department hotute kaihhruaina hnuaiah Contractor-te’n kar kalta tawplam khan khaw hrang hrang tlawhin line kal vel dan tur an enfiah a ni.

He hmalaknain a tuam tur khaw 29 zingah khaw 23 chu Lunglei District huamchhunga awm niin Tlabung Sub-Division huamchhunga Bru-te chenna Dinthar leh Indo-Bangla ramri depa awm Dursury khua pawh heng zingah hian a tel a, Power and Electricity Department hotute leh hnathawktu atana thlante hi Tlabung Village Council-te chuan lo dawngsawngin, tluang taka Rural Electrification kalpui a nih theihna atana rawtna an neih te an sawipui nghal a ni.

Hetihlai hian ‘Statistical Handbook 2026’ ah chuan Mizoram-a chenna khua 730 zinga khaw 717 te chu Eng pekna a nih thu leh za zela 98.19 te chu Eng pek an nih thu tarlan a ni thung.