February 10 atangin Aizawl-ah 'LESDE Kut'

Labour, Employment, Skill Development and Entrepreneurship (LESDE) changtu Minister Lalnghinglova Hmar chuan ‘LESDE Kut’ an buatsaih dawn thu sawiin, Mizo thalaite tan thil tangkai leh tha tak a ni dawn tih a sawi.

Nimin khan a Pisa-ah thuthar thehdarhtute kawmin LESDE Minister Lalnghinglova chuan tun thla, February 10 atanga 14 chhung khian Aizawl Lammual-ah ‘LESDE Kut’ hman a nih dawn thu sawiin, he hun hi Ministry of Micro, Small, Medium Enterprises (MSME), National Scheduled Caste (SC)/Scheduled Tribe (ST) Hub nen tangkawpa an buatsaih tur a nih thu a sawi a, he hun hi mahni kutkawih thiamna hmanga eizawngtute bakah, sawrkar laipui leh Mizoram sawrkar hnuaia Agency te inkara remchanna siam sakna hun tangkai tak a nih a beisei thu a sawi a. LESDE Kut chuan tum tam tak a neih thu leh heng zingah hian Mizoram tualchhung a thil chi hrang hrang siamchhuahte chu a hralhna lamah huang a zauh pui ngei a beisei thu te, thalai hna la hmu mai lo thiam thil nei tha tak takte tan rampawn lama hnathawh tur inkawhhmuhna hun a nih tur thu te a sawi a. Hei bakah hian MSME, Self Help Group (SHG), kuthnathawktu te, hna zawnglai te leh entrepreneur-te, Department inrelbawlna atana an mamawh bungraw siamtute leh service petu te thil siam leh service tihlar leh pholan tumna a nih thu a sawi bawk a ni.

Heng bakah hian Minister chuan State Level Special Vendor Development Programme an buatsaih tur thute, hemi atan hian National Highways & Infrastructure Corporation Limited (NHIDCL) bakah Power Grid Corporation, Indian Oil Corporation Limited, Food Corporation of india, North Eastern Eletrical Power Corporation Limited (NEEPCO) leh North East Frontier Railway (NFR) te an tel tur thu a sawi bawk.

Minister Lalnghinglova Hmar chuan Labour Kut lo awm tur pual hian MBOCWWB hnuaia inziaklutte tan eizawnna kailawn an tih mai, Skill Training & Entrepreneurship Support bakah ‘Rahbi Chhertu’ tia a hming an vuah, a thlawna Coaching inpekna hun chu hawn a nih tel tur thu a sawi bawk a. Thalai hna zawng laite tan Job Fair buatsaih a nih tur thu te, Zirlai hmalam hun tur chiang lo te tana inkaihhruaina 'Career Guidance' neih a ni dawn bawk tih sawiin, Sub-Regional Employment Exchange (SREO) hnuaia a thlawna Course pek zawng zawng pawh programme neih chhung hian pholan a nih dawn thu leh MYC hnuaia programme hrang hrang awm te hrilhhriat an ni dawn bawk tih a sawi a ni.

He Kut hman turah hian Florist Association, Pangpar Zuar Association, Art Exhibition, Food Court leh naupang intihhlimna hmun (Child Play Station) te a awm dawn bawk a, a tawp ni-ah Fashion Show leh Concert bakah intihsiakna dang te pawh buatsaih a ni bawk ang.