Aizawl-ah Mizo hming hawh-a sumdawng an tam

Mizoram First pawl chuan Aizawl khawpui Kulikawn atanga Zemabawk inkar a Veng 24-ah an zirchianna atanga a lan danin an hriat theih chinah hnamdang dawr 122 a awm thu an sawi.

Nimin-a Aizawl Press Club-a thuthar thehdarhtute an kawmna ah Mizoram First te hian he thu hi sawiin, nikum October thla khan Aizawl khawpui chhunga Veng 24 te hi an zirchian thu sawiin, hnamdang dawr 122 a awm thu hi an sawi a, heng dawr an tarlan tak zinga 76.2%, mi 342 chu a nghaktu hnamdang an nih thu leh hnamdang ten Mizo hming hawha an sumdawnna a nih thu an sawi a, zaa 34-te chu ILP nei lo an nih bakah heng mite hi Assam leh Bihar atanga lo kal an tam ber thu an sawi a. Aizawl a hnamdang dawr an hriat zingah 39.3% te chauhvin GST an pek thu leh a tam zawk in an registration an tarlan loh thu te, In sakna bungraw zawrhna bakah Mizoram nitin mamawh eichawp thil a hlawma pekchhuahna tam zawk chu hnamdang kutah a awm deuh vek tawh thu an sawi a ni.

Mizoram First-te chuan sumdawnna hmanga inchimralna a awm loh nan ILP leh sumdawnna vilna tur 'Digital System' hman a tul tih sawrkar hnenah an rawt thu sawiin, ILP vil leh chhui zuina Real Time Visitor Tracking te, Sumdawnna Chhinchhiahna Digital Business Mapping bakah Chhiah Pek Vilna Automated Compliance-te chu neih a tul tawh hle tih an sawi a. Hnamdang huat vang leh thik vang ni lovin Mizo hnam a him theih zawkna atan hemi kawng a hmalatu tur ni a an hriat, Home Department, Information & Communication Technology, Tourism leh Taxation Department changtu Minister te bakah Chief Minister bulah pawh he thil hi an thlen tawh thu an sawi bawk.