Kum 2028 KTP General Conference Champhai-ah

Kum 2028-a Kristian Thalai Pawl (KTP) General Conference thlengtu tur Mamit lam an remchan tak loh avangin Central KTP chuan a thlengtu tur an dap kual hnuah Champhai Zotlang Sports Stadium-ah nghah turin ruahmanna an siam nia thudawn a ni.

Thudawnna in a tarlan danin Mamit hi kum 2028 KTP General Conference thleng tur hian hun rei tak an lo inbuatsaih tawh a, thlen an tumna ber Mamit GSA Field chu tunah hian Phullem (Artificial Grass) phah tura ruahmanna siam a nih avang leh phah mai tura hna thawh tan tura inbuatsaihna kalpui mek anih avangin hman theih a ni dawn lova, Grass phah hnuah Pandal sak a rem dawn loh avang leh hmundang han nghah mai na tur remchang an hmu loh avangin an thleng thei dawn ta lo nia tarlan a ni.

Central KTP chuan kum 2028 KTP General Conference thleng tur Mamit lamin an phat tak avang hian a thlengtu tur an zawng a, Cham-phai lam biak an nih hnuah Champhai lam hian rem an lo tih avangin thleng turin thutlukna siam a ni a, Bethel Bial, Zotlang Bial leh Ruantlang Bial ten Zotlang Sports Stadium-ah an thleng dawn nia tarlan a ni. Kum 2030 KTP General Conference thleng tur erawh Official chuan puan a la ni lo a, Saitual-a General Conference neih hunah puan tur a ni.

Kum khat dan-a March thla Pathianni hmasa ber-a neih thin KTP General Conference hi kumin hi neih kum niin kumin hian Saitual in an thleng dawn a, tunah hian inbuatsaihna ngawrh taka kalpui mek niin Pandal sak hna pawh zawhfel a ni dawn hnai a, tunah hian hmun hrang hrang atanga Palai kal tur pawh an inbuatsaih mek a ni.