Sustainable Ginger Cultivation Programme an duan thu Horticulture Minister in a sawi

Horticulture Minister C. Lalsawivunga chuan Mizo Sawhthing chu Sawhthing chi dangte aia rimtui tak leh hriak tha tak, khawvel huapa quality a san avanga hriat pawh hlawh chho zel tih sawiin, Ram tichhe tlem zawka chin a nih theih nan Department chuan Sustainable Ginger Cultivation Programme a duang tih a sawi bawk.

Mizoram-a Sawhthing hlawk zawka chin leh tunlai thiamna nena inhnerem zawka kalpui a nih theihna tur atana inkhawmna, Consultative Workshop on Mizo Ginger-USP for the State of Mizoram chu nimin khan Aizawl-a MINECO Conference Hall-ah neih niin he hunah hian Horticulture Minister C. Lalsawivunga chuan Sawrkarin loneitute hamthatna a ngaih pawimawh thu leh nikumah Sawhthing support price atan cheng vbc. 140 vel pek a ni tih a sawi a. DoNER Minister pawhin Sawhthing chungchang hi phurpuiin, a hring ringawt ni lova a ro-a hralh a niha, man man zawka hralh a nih theih nan leh Post-Harvest loss a tlem zawk nan Mizo Sawhthing hi USP atana State sawrkarin a thlan angin DoNER pawhin a pawmpui thu a sawi a. Horticulture Department leh Planning Department hnuaia PIME Unit tangkawpin Ministry of DoNER-ah DPR theh lut tawhin, cheng vbc 35 hmuh an inbeisei thu a sawi a ni.

Minister chuan Sawhthing thar leh ching tam ber District Champhai-ah bultan nan Sawhthing sawngbawl hna (ginger processing) kalpui tum a ni tih sawiin, a hmunpui (hub) chu Mualkawi-ah awm tura duan a nih thu leh Zotlang, Vaphai leh Mualcheng-ah a hmundangte (spoke) din tum a nih thu a sawi a. Ram tichhe tlem zawka chin a nih theih nan department chuan Sustainable Ginger Cultivation Programme a duang tih a sawi bawk.

He huna tarlan a nih danin Mizo Sawhthing chi thum – Thingpui, Thingria leh Thinglaidum zingah Thingpui leh Thinglaidum te hi ‘Mizo Ginger’ tih hming hnuaiah Geographical Indication (GI) pek tawh an ni a. Kum 2025-2026 chhungin Mizoram pumpuia sawhthing chinna hmun zau zawng chu acre 23387.09 niin quintal nuai 1.15 chin ah quintal nuai 6.65 thar beisei a ni.