Storm Drain Projects leh Major Works khuhhawnna neih a ni

Mizoram chhunga khawpui hrang hrangte tih hmasawnna tur Storm Drain Projects leh Major Works dangte chu nimin khan UD&PA Minister K. Sapdanga chuan a khuhhawng.

Planning & Programme Implementation Department Conference Hall-a hemi puala hun hman ah UD&PA Minister K. Sapdanga chuan hna pawimawh tak, khawpui hmasawnna tur chauh nilo, khuarel chhiatna thleng thei laka khawpui venhimna hna khuhhawn a ni chu lawmawm a tih thu sawiin, “Kan khawpui-ah te hian hmasawnna hna kan mamawhte zinga hmanhmawhthlak ber chu tui luan kawr tha a ni,” a ti a. “Zirbingna atanga a lan danin Aizawl khawpui chhungah inthiarna leh choka-a tui kan hmanral hi nitin litre mtd 48.6 a ni a, heng tuite hi tui luankawr thleng pha lova leia thamral deuh vek an ni a, Fur-ah a let tam tak tui a lo luang bawk a, hei hian lei chunglang chiah hnipin, kan chenna khawpui hi a kum telin a derthawng tial tial,” tiin hei vang hian In tin atanga tui chhuak zawng zawng leh ruahtui luan luhna tur tui luankawr siamna tur Storm Drain Project duan a ni, tih a sawi a ni.

UD&PA Department hnuaia project khuhhawnte hi State Assistance to States for Capital Investment (SASCI) hnuaia Aizawl khawpui chhung hmun 26-a tui luankawr km 8.135 siamna turte; District Headquarters hrang hrang 10-ah tui luankawr km 11.514 siamna turte; Khawpui hmasawnna tur project hrang hrang - Multi Utility Building, Community Hall, Auditorium, Approach Road leh Handholding Policy 2025–2026 hnuaia Aizawl khawpui chhunga Composite Urban Development hna chi hrang hrang – Drain, Step, Retaining Wall, Culvert, Approach Road, Footpath siam leh a dangte niin a vaiin hna 237 awmin cheng nuai 1122 dah a ni.