Hnam peng hrang hrangte huikhawmtu tha tak mai chu zirlai pawl hi an ni thin - Chief Minister

Chief Minister Lalduhoma chuan Zirlai pawl chu Hnam peng hrang hrangte huikhawmtu tha tak an ni thin tih a sawi.

Pang hnam Kut ropui ber leh ngaihhlut hlawh ber pakhat, Naumariamlak Kut (Nau Lawm Kut) chu nimin khan Vathuampui khelmual-ah Pang Zirlai Pawl huaihawtin hman a ni a, he hun hi Chief Minister Lalduhoma chuan hmanpuiin Zo hnahthlak hnam peng hrang hrangte hian zia leh tih dan kan nei hrang thliah thliah tih sawiin, “Heng kan hnam peng ziate hi a riralin kan theihnghilh ang tih a hlauhawm thin. Thangthar ten kan hnam ze tha tak tak te, kan tawng te, kan thu leh hlate a boral loh nan tha taka kan humhalh thiam a ngai hle,” tiin, “Hnam peng hrang hrangte huikhawmtu tha tak mai chu zirlai pawl hi an ni thin a. Pangfate huikhawmtu atan pawh hian Pang Zirlai Pawl tluka chak leh huapzo hi in nei lo mai thei. Chuvang chuan zirlai pawlte hmalakna hi ka fakin tha ka ti thin hle a ni,” a ti a. Zirlaite chu zirna ngaipawimawh tura fuihin, “Hriatna leh finna hian mihring theihna a tipung a, mipui nawlpui hmasawnna a thlen thin. Pang thalaiten zirna lama hma in sawn zel theih nan, kum tam tak in lo dil tawh thin Pang Hostel chu Ainawn Veng-ah Pang Hostel sak kan tum dawn a ni,” a ti a. Zirna ngaihlu hnam apiang an dingchang zel tih sawiin, Pang thalaite chu ngaihlu turin a chah bawk.

Pang hnam chu Mizo hnam zinga thlang tla hmasa pawl an nih a rinawm thu pawh Chief Minister chuan sawiin, “Hnam lian tak ni chungin in Hnam chanchin chhiar tur hi a tam lo viau mai a. Hei hi thangthar fing zawkten rawn vei ula, ziaka dah i uar ang u. Mizo hnam tobul chhuichian hi sawrkar chuan tha kan ti a, hma kan la mek a. Mipui nawlpui pawmtlan theih history rintlak kan chhuina kawngah pawh Pang history hian dinhmun pawimawh tak a luah hialin ka ring a ni,” a ti.

Chief Minister chuan Mizoram chhim lam bial chu engtikah emaw chuan Mizoram kawtchhuah a nih tur thu sawiin, “Ministry of DoNER hnuaia High Level Task Force on Northeast Economic Corridor-ah Chairman ka ni a. India hmarchhak ramten kan hlawkpui theih inkalpawhna kawngpui tha kan neih theih dan tur kan sawiho thin. KMMTTP hi Mizote chauh ni lovin kan thenawm State te pawhin an nghakhlel em em a. Puitling thuai thuai se an duh a ni. Hmanni lawk khan Myanmar ram chhunga KMTTP kawngpui sialtu Company hotute nen kan inkawm a, kum 2027 ah an hna hi thawh zawh theih an inbeisei a. A taka kan chhawr hun hi a hla tawh lova, a tangkaipui bertu tur chu Lawngtlai District hi in ni,” tiin KMMTTP hmalakna a sawi bawk.

Naumariamlak Kut (Nau Lawm Kut) hmanna hi Lalramliana chuan kaihruaiin Pang Zirlai Pawl President Albin Lalhruaitluanga chu Kut Thlengtu a ni bawk.