Sairang Rel Station atangin ILP 23,001 pe tawh

Nikum September ni 13-a Sairang-a Rel a luh atanga nimin thleng khan Sairang Rel Chawlhhmun-ah Inner Line Permit (ILP) 23,001 pekchhuah a ni tawh.

Sairang Rel Station ILP Counter atang hian nikum September ni 13 atanga December ni 31 thleng khan ILP 20,914 pekchhuah niin, kumin January ni 1 atanga nimin, January ni 11 thleng khan ILP 2,087 pekchhuah a ni leh tawh a, heti hian a vaiin ILP 23,001 pekchhuah a ni tawh a ni. Sairang Rel Station-a ILP pechhuaktute chuan nikhat-ah Rel vawi hnih lo thlen chang leh vawi khat chauh lo thlen chang a awm tih sawiin, chawhrualin nitin ILP 160 atanga 170 vel an pechhuak thin tih an sawi a. Rel rawn luh tan tirh nikum October thla leh November thla inkara ILP an pek tam zawk chu khualzin (tourist) an nih thu leh tunah chuan inhlawhfa tura lo lut (labour) leh Medical Representative (MR) te chu ILP pek zingah an tam tawh tih an sawi bawk.

ILP pekchhuah zingah Assam ttanga lo lut tam berin West Bengal, a bikin Kolkata-in dawtin State dang hrang hrang atanga rawn zin lut pawh an awm reng tih an sawi a, Rel hmanga rawn zin lut zingah online kaltlanga ILP la an tam zawk chang a awm tih an sawi bawk. 

Sairang Rel Station ILP Counter atang hian October thla kha ILP pekchhuah tam ber thla niin 6,547 pekchhuah a ni a, December thla khan dawtin 5,992 pek chhuah a ni a, November thla ah 5,765; September thla ah 2,610 pekchhuah a ni bawk.