Nikum-a Police thubuai ziahluh zingah mi rawk leh rukruk thubuai a tam

Mizoram Police-te chuan kum liamta (2025) January atanga October thla thleng khan Bharatiya Nyaya Sanhita (BNS) 2023 hnuaiah thubuai 2,039 an ziaklut a; heng zingah hian mi rawk leh rukruk thubuai chu a tam ber a ni a. Special & Local Law hnuaia thubuai 709 an ziahluh zingah ND&PS Act hnuaia ziahluh a tam ber bawk a ni.

Mizoram Police te hian kum liamta (2025) January atanga October thla chhung khan BNS 2023 hnuaiah hian thubuai 2,039 zet ziaklutin heng zingah hian mi rawk leh ruk ruk kaihhnawih thubuai chu a tam ber a, hemi hun chhung hian mi rawk thubuai 914 zet ziahluh niin rûkrûk thubuai 614 ziahluh a ni bawk a, heng bakah hian mi kutthlak thubuai 73 ziahluh niin tualthah thubuai 17 te, pawngsual thubuai 26 leh inbumna thubuai 53-te chu thubuai ziahluh zingah a langzar zual an ni.

Police ten an chhinchhiahna atanga a lan danin kum 2021 atanga chhiarin nikum October thla thleng khan Mizoram Police hian BNS/IPC hnuaiah thubuai 13,118 ziaklutin heng zingah hian rûkrûk leh inrawkna thubuai chu a tam ber a ni a, kum 4 leh thla 10 chhung hian Mizoram Police-te hian BNS (tunhmaa IPC tih thin) hnuaiah thubuai 13,118 an ziaklut a; heng zinga thubuai 5,166 chu rûkrûk thubuai niin thubuai ziahluh tam ber a ni a, thubuai ziahluh zawng zawng atangin za zela 39.38 a tling a. Rûkrûk thubuai hi mi rawk thubuai 4,773-in dawtin, inbumna thubuai 640 leh mi kutthlak thubuai 444-te chu thubuai ziahluh zinga a tam zual a ni bawk. Kum 4 leh thla 10 chhung vek hian Mizoram Police-te hian tualthah thubuai 121, pawngsual thubuai 112, tualthah tumna thubuai 84 leh pawisa lem kaihhnawih thubuai 20 ziaklutin heng thubuaite hi a langsar zual an ni.

Nikum 2025 January atanga October thla chhung vek khan Mizoram Police-te hian Special & Local Law hnuaiah thubuai 709 an ziaklut bawk a, heng zingah hian ruihhlo kaihhnawih (ND&PS Act) hnuaiah thubuai 267 ziahluh niin a tam ber a; Hursualna laka naupangte venhimna Dan POCSO Act hnuaiah thubuai 126 ziahluhin dawtin Zu khapna dan (MLP Act) hnuaiah thubuai 183, Ralthuam kaihhnawih (Arms Act) hnuaiah thu-buai 31, Puakthei thil dang kaihhnawih (Explosive Substances Act) hnuaiah thubuai 27, Information & Technology Act hnuaiah thubuai 7 ziahluh a nih bakah Special & Local Law kaihhnawih thubuai dang 68 an ziaklut a ni a. Special & Local Law hnuaiah hian kum 2024 January - October thla chhung vek khan thubuai 736 ziahluh a ni a; nikum thla 10 chhunga thubuai ziahluh aiin kum hmasa thla 10 chhunga thubuai ziahluh zat hi 27 in a tlem zawk a ni.