Phuaibuang-ah 'Tlaizawng Paradise' hman a ni

Ni hnih (2) chhung awh 'Tlaizawng Paradise' kharna chu nizan hmasa khan Phuaibuang Field-ah a kharna neih a ni a, Tourism Minister Lalnghinglova Hmar leh Speaker Lalbiakzama ten an telpui a ni.

Tourism Department hmalakna a buatsaih 'Tlaizawng Paradise' hi January ni 6 leh ni 7 khan hman niin, Tuivai lui-a Nghakuai chiah runpuite, Phuaibuang khaw chhevela tlang, puk leh lui dung tlawhchhuahna hunte buatsaih a ni a. Phuaibuang leh a chhevel khua mipuite thil siamchhuah phochhuahna hmunte buatsaih a ni. He huna tarlan danin Phuaibuang-ah hian Tlaizawng Paradise chhimtu khualzin mi sang khat chuang ziahluh a ni.

Tunkar Thawhlehni khan 'Tlaizawng Paradise' hi Mizoram Legislative Assembly Speaker Lalbiakzama chuan Tuivai lei-ah hawngin leilung hausakna leh mawina hmanga zin mite hip thei tura Phuaibuang khua a 'Tlaizawng Paradise' buatsaih a ni chu lawmawm a tih thu a sawi a. Kan khua mawina hluta rawn tlawhtu mikhualte lawm taka dawnsawn thiam a pawimawh thu sawiin, chumi tur chuan khawtlang tanrualna leh thawhhona a pawimawh thu a sawi bawk. Speaker Lalbiakzama chuan Anthurium leh Hnahsin bakah pangpar hming chawia hunpui buatsaih pathumna ni tura 'Tlaizawng Paradise' thlan a ni chu thil chhin-chhiah thlak tak a nih thu a sawi bawk a ni.

'Tlaizawng Paradise' kharna hun hi Phuaibuang Field-ah hman niin he hun hi Tourism Minister Lalnghinglova Hmar chuan a telpui a, Mizoram chu leilung mawina leh hausakna tam tak nei a nih thu leh khaw hrang hrang pawhin mawina leh hausakna danglam bikna an neih thu sawiin, Phuaibuang khua chu pangpar mawi tak Tlaizawng parna hmunpui a nih thu a sawi a. Tlaizawng Paradise chu Tlaizawng par vul nasat hunlai, kum 2026 December thla a buatsaih leh tum a nih thu pawh a sawi bawk.