Lengpui Airport Runway siamthat hna thawk mek

Lengpui Airport Runway siam that hna thawh mek chu tunkar Nilaini khan PWD Minister Vanlalhlana hovin PWD hotu ten an tlawh a, tha tak leh chak taka thawh zawh thuai a nih theih nan hnathawh te chu a hmunah enfiah a ni.

He hunah hian PWD Minister Vanlalhlana chuan runway tha neih chu Mizoram tan thil chhenfakawm tak a nih tur thu leh ramin hma a sawn zelna atana thil pawimawh berte zinga pakhat a nih thu a sawi a. Hnathawh lai mek pawh a lungawithlak hlea a hriat thu sawiin, a tha thei ang ber leh a hma thei ang bera thawk zo turin thawktute chu a chah a; ruahman anga thil a kal tluan theih chuan March 31, 2026 hian Runway Re-carpeting hi thawh zawh hman an inbeisei thu hnathawktute chuan an sawi a ni.

Lengpui Airport hi kum 1998-ah Mizoram Sawrkar PWD siam a ni a; a lo upat ve tawh bakah a chak zawng pawh 38 PCN (Pavement Classification Number) chauh a ni a, resurfacing-te lo tih tawh thin ni mah se, Aviation lama thuneitu DGCA chuan duhthu a sam loh thu an lo sawi tawh thin a. Mizoram Sawrkar chuan eng tiang taka thawmthat ngai nge a nih hre tur leh zirchiang turin CRRI (Central Roads Research Institute) ruaiin, tunah hian Thlawhtheihna lian chi pawh tum theihna tur, 50 PCN tal ni turin re-surfacing hna hi thawh mek a ni ta a ni.

Re-surfacing hna thawh nan hian Mizoram Sawrkar chuan SASCI atangin cheng vbc. 91 a ruahman a, a thawktu atan Airport lama tawnhriat nei tha, Brahma Infra, Rajasthan lam mite rawih niin anni hian nikum April, 2025 atang khan hmanraw mamawhte chhekkhawmin hma an la tan a, Fur a nih avangin duh anga chakin hna an thawk tan lawk thei lova; November ni 1, 2025 khan Trial Run neiin, November ni 10 atang khan re-surfacing hna hi an thawk tan ta a ni.

He hmalakna ah hian Runway bitumen layer awm sa, CRRI ten 130 mm tal laihchhuah vek tur an tih chu tha lehzual turin tunah hian Germany siam Milling Machine hmangin 150mm laihchhuah a ni a, layer hmasa berah Dense Bituminous Macadam (DBM) 65mm a chhah Bituminous Course phah a ni ang a, DBM layer khatna phah zawh a nih hnuah a chungah glass grid leh SAMI layer phah a ni leh anga, chumi chungah chuan DBM layer hnihna 65mm a chhah phah leh tur niin a chung berah BC 40mm a chhah phah a ni leh bawk dawn a, a layer pumpui chhah zawng hi 170mm a ni dawn a ni.    

Zin veivakte ti khaihlak lo thei ang ber tura hna hi thawh niin, Thlawhtheihna pawh ni tina tum tir reng tho a ni a; ni tinin thlawhna thlawk chhuak hnuhnung ber a thlawhchhuah hnu, tlai dar 4:45 vel atanga tanin, chhun lama Thlawhtheihna a tum leh theih nan zingkarah PWD ten Quality test nei lehin, Air Traffic Controller (ATC) in an pawmpui a ngai a ni.