Govt. Aizawl College building inhlan chungchang sawiho

Aizawl Sikulpuikawn-a Govt. Aizawl College building inhlan chungchang chu niminpiah khan Higher & Technical Education Minister Dr. Vanlalthlana hovin a Pisa-ah Mizoram Presbyterian Kohhran hruaitute nen sawiho a ni.

Mizoram Sawrkar leh Mizoram Presbyterian Kohhran inremna angin kum 2019 khan Sikulpuikawn-a Govt. Aizawl College dinna ram chu Mizoram Presbyterian Kohhran kutah hlan a lo a ni tawh a. Govt. Boys Primary School leh Govt. Boys Middle School, Sikulpuikawn chu School building leh a ram nen Mizoram Presbyterian Kohhran kuta hlan niin Govt. Aizawl College building chu hemi ram hian a huam tel a. Govt. Aizawl College building chu Mizoram Presbyterian Kohhran hnena hlan fel vat a nih theih nan hian huntiam siam niin a hma thei ang bera sawiho leh a, sawrkar leh Kohhrana thuneitu sang zawk hnena thlen vat nise tih an sawiho a ni.

He Meeting hian building inhlan fel dan tur chungchanga hma lo la tur leh agreement duangtu tur Drafting Committee a din a. Higher & Technical Education Director chu Convenor atana ruat niin Department atang hian Committee Member atan Under Secretary leh Govt. Aizawl College Principal ruat an ni a, Mizoram Presbyterian Kohhran atangin Rev. Dr Rosiamliana Tochhawng, Executive Secretary (i/c Education) leh Synod Secretary (Jr) Upa C. Lalmuankima te chu ruat an ni bawk.