MNF in Inthlanna hrang hrangah hnehna chan inring

MNF Party chuan AMC Inthlan lo awm tur leh Inthlan dang lo awm zel turah hnehna chan zel an inrin thu leh an beisei thu an sawi.

Nimin khan Aizawl-a Mizo Hnam Run-ah MNF Office Bearers Meeting chu an Party President, Zoram-thanga kaihhruaiin neih a ni a, Aizawl Municipal Corporation (AMC) Inthlan lo awm turah MNF chuan Candidate tha tak tak an nei dawn nia sawiin, lawmawm an tih thu an sawi a, “Aizawl khawpui hmasawnna leh than zelna turin AMC Election lo awm turah hian hnehna sang tak kan chan ngei kan ring tlat a ni,” an ti a. Ram rorelna ah Opposition Party ni chungin MNF chuan hniam lam aiin san lam panin, nasa takin hma an sawn zel nia sawiin, “Sinlung Hills Council Election leh Dampa bial By Election-ah Ruling party hnehin chakna kan chang a, LADC Election neih zawh takah MNF MDC an tling tam ber a, Village Council By election hmun hran hranah hnehna kan chang deuh vek a, he kan chakna hi Pathian leh Mipuite tanpuina leh duhsakna vang a ni tih kan hre reng a. AMC Inthlan lo awm tur leh Election dang awm zel turah pawh hnehna chan zel kan inringin, kan beisei tlat a ni,” an ti bawk.

MNF Office Bearers Meeting chuan an Party President Zoramthanga kaihhruaina chu an ring tawk tih pawh sawiin, “Inpumkhatna leh thawhhona tha tak nen ke pen zel kan tum a, Mizoram Sawrkar tha tak siam leh turin theihtawp kan chhuah zel dawn a ni,” an ti bawk.