Mizoram-a Political party hrang hrang ten kum 2026 atan an Party Office an hawng leh ta

Mizoram-a Political Party pathum hrang hrangte chuan kum 2026 atan an Party Office te chu nimin khan an hawng tan leh ta.

ZPM Party chuan nimin khan Aizawl-a an Office chu kum 2026 atana hawnna hun hmangin he hunah hian Chief Minister Lalduhoma chuan an party-a awm zawng zawngte chu ngaihdam ngai apiang inngaidamin, he kum thar hi inremna a bul tan turin a sawm a, he hunah hian sawrkar hmalakna hrang hrangte a sawi bawk a ni.

MNF Party chuan nimin khan Aizawl-a an party Office, Mizo Hnam Run hawnna hun hmangin MNF President Zoramthanga chuan, “Awihawm lo khawpa makin Pathian in min hruai a, min hruai zel dawn a ni. Manganna hrang hrang kara kum 64 MNF min hruai tawhtu Pathian hian MNF hi kawng laklawhah min kalsan lovang. Pathian vuan tlat ila, Amah i innghat tlat ang,” tiin “India ram leh Mizoram-ah pawh Party tam tak an ral tawh laiin MNF chu Mizoram-ah pawh party ruhrel lian ber kan ni mek a. 'Pathian leh kan ram tan' tia kan din tlatna chu kan felnaah Pathian in a ruat a. In thlaphan dawn apiangin Pathian kan innghahna a ni tih hrereng turin MNF mipuite ka chah duh a ni,” a ti bawk.

Congress Party pawhin nimin khan Aizawl-a Congress Bhavan hawnna hun hmangin he hunah hian MPCC President, Lal Thanzara chuan kum kalta 2025 chhung khan an party in Pathian hruaina tam tak an dawn thu leh Party dang atangin member thahnem tak Pathian in a pek thu a sawi a. “Inthlang ram kan ni a, kan hlawhtlin loh chang a awm fo a ni. Mahse kan chak loh chang hi hmalam kan panna tura min ti chaktu a ni thin a, hmalam kan panna tura thil tha zawk min ngaihtuah chhuah tirtu a ni. Chuvangin party a nghet tak a awm turin leh beidawng mai lo turin ka chah duh che u a ni,” tiin party mipui kalkhawmte a chah a ni.

BJP Mizoram pawhin Aizawl-a an party Office, Mipui Run chu nimin khan a hawnna hun hmangin an President Dr. K. Beichhua chuan kum 2026-ah fimkhur taka an kal a pawimawh thu a sawi a, “Pathian lam en a, Pathian ring chungin kan kal zel anga, a kaihhruaina hnuaiah lungrual takin kan kal zel dawn a ni,” a ti a. “Kumin ah inthlan pawimawh tak AMC Election kan hmachhawn leh dawn a, chumi atan chuan uluk taka kan inbuatsaih a, AMC tih chakna tur atan keini BJP Party hi kan pawimawh a ni tih kan hriat a, Mizoram khawpui Aizawl-ah AMC kaltlanga mipui rawngbawlna hna thawk tur leh Mizoram hmel lanna Aizawl Khawpui ah hmasawnna nasa zawk a lo thlen zel theih nan hma kan lak nasat a pawimawh hle a ni,” a ti bawk.