Mizoram mipui ten VB-G-RAM-G Scheme thar an hlawkpui an beisei thu BJP Mizoram in an sawi

BJP Mizoram State chuan ‘Viksit Bharat - Guarantee for Rozgar and Ajeevika Mission (Gramin)’ chu Mizoram mipui ten an hlawkpui ngei an beisei thu an sawi.

Nimin-a Aizawl Press Club-a thuthar thehdarhtute an kawmna ah BJP Mizoram State hruaitute chuan Central Sawrkar in MGNREGA, ni 100 inhlawhna kan tih chu changtlung zawka siama ‘Viksit Bharat - Guarantee for Rozgar and Ajeevika Mission (Gramin)’ a duan thar chungchang hi an sawifiah a. “Ni 100 inhlawhna MGNREGA hnuaia kalpui thin kha, tuna Scheme thar siam tak VB-G-RAM-G Scheme thar hian nikum kumtawp, 15th December, 2025 khan thlak niin, he dan thar ah hi chuan ni 100 mai ni lovin ni 125 inhlawhna, hnathawh theihna tur a duan a ni ta hi a lawmawm em em a, Mirethei tam tak ten he Scheme kaltlanga inhlawhna tha tak kan hmuh theih dawn a vangin a lawmawm hle a ni,” an ti a. VB-G-RAM-G Scheme chungchangah hian mi thenkhat ten ‘Scheme zawng zawng hi Central-in a ruahman vek dawn’ tih dawt thuthang an thehdarh nia sawiin, “Gram Panchayat leh Gram Sabha te'n an khua leh tui hmasawnna tur chu anmahni ngeiin an ruahman anga, khaw chhungah hna eng ang nge thawh tur tih pawh anmahni'n an rel thei dawn a, ruahmanna siam chungchangah a mawhphurhtu lian tak chu Village Council (VC)-te an ni dawn a ni,” an ti.

VB-G-RAM-G Scheme hnuaiah hian hna thawh tur zatve (50%) aia tam chu Gram Panchayat (VC/VEC) kaltlangin direct-in thawh theih a nih dawn thu leh hei hian khawchhung mi te tan hna a siam thei ang tih sawiin, a takin thingtlang khua ten hmasawnna an hmu thei dawn niin an sawi a. Gram Sabha leh Gram Panchayat ten an khua/veng tana hmasawnna tur ruahmanna an siam turah ngaihpawimawh tak tak pali an pali (4) thlangtin chungte chu- Tui dahkhawlna (water conservation), Hmasawnna hna thawhna tur siam (infrastructure creation), eizawnna tihchakna (livelihood-oriented works) leh Chhiatrupna lo thlen thulha ruahmanna (disaster management) lo siam te a nih thu an sawi bawk.

He Scheme thar hian hlothlawh leh buh seng hun laia loneitu te tan remchanna a siam sak that thu leh kum khatah ni 125 hna an thawh theih ngei na tur (guarantee) a la awm reng tih pawh sawiin, Thingtlang lam loneimi te tan kum khat ah State Sawrkarin ni 60 thleng hna chawlhtir theihna thuneihna an nei bawk tih an sawi a. Central Sawrkar in ram mipui, mirethei te tan he ruahmanna a siam hi lawmthu sawi mawlh mawlh kan ba niin an sawi bawk a ni.