Kawlphetha chungchang thlenna tur Apps zirho

Mipui ten kawlphetha pekchhuahna kawnga thil diklo awm te P&E Department hnena awlsam taka an hriattir theihna tur, Electric Incident Reporter System tlangzarh tak hman dan inzirtirna chu nimin khan P&E Department-a JE leh a chunglam Officer te tan Serchhip-ah buatsaih a ni.
Power & Electricity Department Transmission Circle leh Maicham Power Division-a JE leh a chunglamte tana Electric Incident Reporter System zirhona hi Bukpui P&E Rest House, Serchhip-ah neih niin he hun kaihruaitu P&E Transmission Circle-a Superintending Engineer, H. Vanlalhlima chuan an hnathawhna kawngah tunlai thiamna an hman tangkai a pawimawh thu sawiin, heng te hi an hna thawh awlsam tirtu a nih thu a sawi a. Electric Incident Reporter System chu nikum lamah an lo tlangzarh tawh thu sawiin, he Mobile Apps hmang hian mipui ten kawlphetha pekchhuahna kawnga harsatna awm leh dan lova thil tih awm te Department-a thawktute hnenah an hriattir theih dawn thu a sawi a. Chutihrual chuan heng an thu thlen lo dawngsawngtu tur thawktute erawh an inpek zual a ngai dawn tih sawiin, mipuite thu thlen an ngaihven loh chuan a tangkai dawn loh avangin thawktu, a bik takin JE leh a chunglam a Officer te chu an pawimawh dawn thu a sawi bawk a ni.

Electric Incident Reporter System hi Mobile Phone Application niin he Apps hi a duh apiang tana hman theih a ni a, Apps chhungah mipui ten kawlphetha pekchhuahna a Line leh khawl tha lo bakah Dan lova kawlphetha hman te thuneitute hnena an thlenna tur awmin mipui ten thu an thlen te P&E Department-a JE leh a chunglam a Officer ten an lo dawnsawnna tur a awm bawk a. He Apps hman dan hi Buannel Geo Solution & Services ten zirtirnin zawhna awm hrang hrangte chhangin an hrilhfiah bawk a ni.

Nimin-a he zirhona neih zawh a nih hnu hian P&E Department-a thawktute hian an hnathawh leh hmalakna thlirhona an nei nghal a ni.