ICT hmalakna thlirlet a ni

Information & Communication Technology Department hmalakna hrang hrang thlirletna hun chu nimin khan ICT Minister Dr. Vanlalthlana hovin Directorate of ICT Conference Room-ah neih a ni.

He hunah hian ICT Department hnuaia Secretariat leh Directorate Officer-te telin ICT Department hmalakna hnuaiah hian Mizo Fiber Grid project hnuaiah Mizoram-a District leh Block Headquarters hrang hrangte chu internet hrui hmanga thlunzawm a ni a. Secretariat Office-ah file zawng zawng e-office hmanga kalpui a ni tawh a. Directorate leh District Office-ah kalpui tum mek niin ICT Directorate chuan he e-office hi an hmang tawh a ni.

Artificial Intelligence hmanga Mizo tawng humhalhna tur leh tawng lehlinna project ‘Bhashini’ hmalakna kal mek bakah Office data hlui vawn thatna 'Digitization of Legacy Data' kalpui mek a ni a. ICT Department leh an hnuaia Mizoram State e-Governance Society (MSeGS) siam software leh mobile app hrang hrangte thlirho ni bawkin, Telcommunication lama hmalakna hrang hrangte pawh thlirho a ni a, hmasawnna tam tak a awm thu ngaihthlak a ni a. ICT Department hian Basic Computer Skills leh website bakah Artificial Intelligence lamah sawrkar hnathawkte tan training a buatsaih thin a. IT leh Cyber Crime chungchang Awareness pawh neih thin a ni.

He hunah hian project kal lai mek zawh vat a nih theihnan hun bituk siam niin hmalakna kal meka harsatna hrang hrangte chinfel dan tur sawiho a ni a. Data policy leh data security tha zawk neih tuma hmalak a tul thu sawiho niin, sawrkar atanga khua leh tui hnena Service (government to citizen service) awlsam zawka pek a nih theihnan ruahmanna siam ni se tih a ni a. Hmalakna tur hrang hrang zingah hian Center for Excellence for AI neih a that thu leh neih theih dan turte sawiho niin neih theih a nih ngei theih nan chak taka hmalak zel tha tih a ni bawk.