Chhungkaw 106 hnenah NCPA hnuaia tanpuina sem

Forest Minister Lalthansanga chuan nimin khan National Plan for Conservation of Aquatic Ecosystems (NCPA) hnuaia tanpuina chu Tamdil humhalh leh tihhmasawn nana thawktu chhungkaw 106 hnenah a sem chhuak.

Tamdil enkawlna tur riruang, Tamdil Wetland Conservation Plan hi kum 5 danah siam thin a ni a, he Plan zulzui hian hmasawnna hnathawh thin niin hetiang hnathawhna atana mamawh te chu National Plan for Conservation of Aquatic Eco-System (NPCA) atanga dawn thin a ni. Tamdil tihhmasawnna tur atan leh a tuihna te a lo chak lehzual theihna tur atan a chhehvel khaw mipuite zinga thawktu (Beneficiary) chhungkaw 574 hnenah tun 2022-2026 Plan chhung hian tanpuina sumfai semchhuah a ni a. Nimin khan Tualbung atangin chhungkaw 31, Sihfa atangin chhungkaw 30 leh Saitual Chawnpui atangin chhungkaw 45, a vaiin chhungkaw 106 hnenah tanpuina sumfai hi Minister hian Interpretation Centre Tamdil, Saitual Range-ah a sem a ni.

He hunah hian Forest Minister Lalthansanga chuan Tamdil lo insiam dan mithiamte chhui dan te tarlangin, he Wetland hi fing taka enkawl a, hman tangkai a nih chuan mi tam tak tan eizawnna siamsak thei a nih thu leh sum tam tak a lakluh nan a hman theih dawn tih a sawi a. Tamdil chu humhalh a ngai hle tih sawiin, Tamdil leh a chhehvel khuaa chengte chu an thlai chinte enkawl nan chemical tel lei tih thatna (fertilizer) leh rannung tihremna (insecticides) te hmang lo hram turin a ngen a, hei hian lei hriselna a tichhia tih sawiin, kan ram chu kan humhalh that loh chuan a chereu mai dawn tih a sawi a, Forest department chauhin an enkawl theih loh avangin khawtlang mipuite chu enkawlpui turin a sawm bawk a ni.