Contractor ten kawng siam zo lo; hun pek belh an ni
Serchhip Bawrhsap Paul L. Khuma chuan nimin khan a Pisa-ah NHIDCL hnuaia Serchhip District chhunga Contractor te kokhawmin kawngpui chhia thawmthat chung-chang hi a sawipui a, Serchhip District tantlangtu National Highway-02 laih thar hi a siamtu Contractor te kutah Maintenance leh Repair la awmin Furpui zawh hnuah kawng chhia, bal leh khuar te engemawzat a awm avangin thawmthat leh chei that mek a ni. Nikum December 6 khan District Bawrhsap hian Contractor te hi kokhawm tawhin Baktawng leh Serchhip inkar kawngpui chu Krismas hma ngeia a siamthat hna zo hman turin a hrilh bakah Serchhip By-pass kawng chhe nasa tak, repair hna an khawih mek pawh January, 2026 ralhma ngeia an zawh hman tur thu Contractor te hian an sawi a ni.
Hetiang a ni chung hian Baktawng leh Serchhip inkar kawngpui Krismas hmaa siam zo tura bituk chu zo hman lovin nimin-a Bawrhsap in Contractor te a kohkhawmna ah hian an siam zawh loh chhan sawifiah tir an ni a. Contractor te hian an bungraw lakna hmunpuiah harsatna an tawh avang leh khawl chhia avanga zo thei lo an nih thu an sawi a. Hei vang hian ruahmanna thar siam niin February ni 12, 2026 ralhmain Baktawng atanga Keitum thleng kawngpui thawmthat hman nise an ti a. February 28-ah Ser-chhip By-Pass road pawh siamtha hman turin ruahmanna an siam bawk a ni.
Nimin-a thutkhawm ah hian Serchhip Bawrhsap chuan Contractor te chu an inhuam ang ngeia hun bi an ruat chhunga kawng thawmtha zo hman turin a hrilh a. Office lam atangin an hnathawh dan an enzui reng tur thu a sawi bawk a ni. He thutkhawm ah hian NHIDCL hnuaia Contractor te an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!