Champhai District-a pipu sulhnu hlui tlawhtu an tam

Mizo thu ziak mi leh hlaphuah thiam thlan-chhuah bikte hriatrengna tura Khawbung khuaa lungphunna hmun, ‘Mizo Hlakungpui Mual’ chu kum kalta 2025 chhung khan mi 6,915-in an tlawh a; kumin April thla khian Mizo Hlakungpui Mual-ah hian Mizo thu ziak mi 4 leh hlaphuah thiam mi 2 sengluh belh tum an ni.

Champhai District chhung Khawbung khuaa ‘Mizo Hlakungpui Mual’ hi kum 1986 khan Mizo hlaphuah thiam Patea leh Damhauva te hriatrengna lung phun a bultan niin kum 10 dan zelah thu leh hla lama thawhhlawk boral tawh zinga thlanchhuah bikte chu a ni bi kima an thih ni atanga kum 5 tling chinte sengluh thin an ni a. Tunah hian Mizo Hlakungpui Mual-ah hian thu ziak mi 15 leh hla phuah thiam mi 21 hriatrengna lung phun a ni tawh a; kumin April ni 8 leh ni 9 khian Mizo zinga thu ziak mi pali - Capt. LZ Sailo, Rev. Zairema, Khawlkungi leh Lalhmingliana Saiawi bakah hla phuah thiam pahnih - Hrawva leh Lalmama te chu helai hmunah hian sengluh an ni leh dawn a ni.

Mizo Hla Kungpui Mual hi puitling tan luh man Rs. 20 a ni a; kum kalta 2025 chhung khan tlawhtu mi 6,915 an nei a, an zinga mi 11 chu ram-dang mi (foreigner) an ni a, India ram State dang mi 16 an awm bawk.

Hetihlai hian Champhai District chhunga khualzin ten an tlawh thin ‘Kawtchhuah Ropui’ pawh tlawhtu an pung ve zel a, Vangchhe khaw dai-a awm ‘Kawtchhuah Ropui’ hi kum kalta chhung khan hriat theih chinah, puitling mi 8575 velin an tlawh a, luhna man mi pakhat zelah Rs. 20/- lak thin niin naupang leh lirthei atangin luhna man lak a ni lo thung.

Champhai District chhung Dungtlang khaw dai-a Lianchhiari Lunglen tlang pawh kum kalta chhung khan mi 13,710 zetin an tlawh bawk a, helai hmun tlawhtu mi pakhat ah Rs 20/- lak thin niin lirthei kenluh man lak thin a ni bawk.