Bana kaih (Handholding) Scheme hnuaia a din Sawhthing sawngbawlna hmun Chief Minister in a hawng
Nimin-a Sawhthing sawngbawlna hmun a hawnna ah hian Chief Minister Lalduhoma chuan kum tam tak chhung an lo vei tawhte a taka a chang chho mek chu lawmawm a tih thu sawiin, “UT kan nih a chin kum 54 vel a lo ni tawh a, loneia eizawng tamna ram ni chungin eng thlai mah hi kan la hmingthanpui ngai lo. Tunah chuan Mizoram chu ‘Ginger Capital of India’ tia hriat kan ni chho tan ta a. Kan loneitute thawh rah zarah kan hmingthang chho mek a ni. Sapthei pawh hi nasa taka kalpui a thain kan hria a, larpui thama ngah kan tum leh dawn a ni,” a ti a. Sawhthing vangin chhungkaw tam takin sum leh pai tam tak an lakluh thu leh mipuiten pawisa an neih avangin sumdawngte tan a lo hlawk a, Kohhran thawhlawm chen-a a pun thu sawiin, “A thlawna sem kan ti tawp a, Moral Reformation a thleng mek a, kan thawhrim rah ngei kan tel mek hi a hlu a ni,” a ti.
Sawhthing hi thla thar February ni 2 atangin an lei tan leh dawn tih Chief Minister chuan sawiin, “Mizo kutchhuak, a zailepna khawl leh a tihrona khawl engemaw zat hi Collection Centre-a dah-a an lo hman theiha chhawpsak kan rilruk mek. Chu chuan Sawhthing process-na kawngah min pui nasa hlein kan ring,” a ti a. “Vawiin a kan hawn hi kan sawrkara a process-na hmasa ber a ni a, a hmunhma hian a dawl zawh avangin tihlen a thain ka ring a. A tul angin tihlen kan tum ang. A pawimawh ber erawh chu a enkawltu tura thlan Good Faith te an ni a, an kutah hian a hlawhtlin leh hlawhtlin loh a innghat thui hle a ni. Khuangleng-ah Processing Unit dang kan din mek a. A enkawltu turin tawnhriat nei tha tak Opickpure te kan thlanga. Chhingchhipa khawl hluite kan tuai thar tawh bawk a. Hma kan sawn zel a ni,” a ti bawk.
Mizoram Agricultural Marketing Board (MAMB) hian Sairang-a Horticulture Centre hmunhma leh building thenkhatte chu Private Company hnenah Sawhthing process nan outsource turin October ni 17, 2024 khan Expression of Interest (EOI) a chhuah a, EOI chhangtute zing atang hian Good Faith, Saron Veng te chu thlan niin anni hnenah hian Mizoram Agricultural Marketing Board chuan Horticulture Centre-a heng building- Transit Godown, Integrated Pack House, Manager Quarters leh Chowkidar quarters te chu MoU fel taka ziakin kum 5 chhung atan January 13, 2025 khan a hlan a ni.
Good Faith hian kum 2025 chhungin an theih ang anga Ginger Processing leh Marketing an kalpui mek laiin Mizoram Agricultural Marketing Board chuan, Horticulture Centre-a Transit Godown-ah hian cheng nuai 71 sengin Ginger Processing Line (khawl) a bun leh ta a. He Processing Unit pawh hi Good Faith enkawl nghal tura tih a nih angin nimin khan Mizoram Agricultural Marketing Board leh Good Faith ten MOU sign nghal a ni.
Helai hmuna cheng nuai 71 ruahman atang hian cheng nuai 61 hman ni tawhin Sawhthing silna khawl bakah tum khat-a kg. 200 tihro theihna dah a ni a, electric chauha tihro a nih chuan a tihrona man a san dawn avangin Ni zung chakna hmanga vawi khata kg 2000 tihro theihna awm telin Sawhthing ro hralhna hi a that avangin a tihrona khawl chak leh lian zawk mamawhna a sang hle nia sawi a ni.
Nimin-a he hun hman hi Agriculture & Farmers' Welfare Secretary Ramdinliani chuan kaihruaiin khual zahawm Horticulture Minister C. Lalsawivunga leh Adviser to Chief Minister Dr. KC. Lalmalsawmzauva te pawhin thu an sawi a, sawrkar mi pawimawh hrang hrangte an tel bawk a ni.