PMUY hnuaiah Gas connection pek leh a ni dawn

Sawrkar laipui hmalakna Pradhan Mantri Ujjwala Yojana (PMUY) hnuaiah Mizoram-a chhungkaw khawsak harsa hmeichhiate hnenah a thlawnin Gas connection 36,031 pekchhuah a ni tawh.

PMUY hmalakna puangzarin nimin khan FCS&CA Sercretary Teresy Vanlalhruaii leh IOC DGM Z.Hlungdim bakah hotu dangten Aizawl Press Club-ah thuthar thehdarhtute kawmin PMUY Scheme chu sawrkar laipuiin kum 2016 May thla khan bultanin ramchhunga chhungkaw khawsak harsa hmeichhiate hnenah a thlawnin Gas connection pekchhuah thin a ni tih an sawi a, PMUY beihpui thlakna hnuaiah ramchhungah Gas connection vbc. 10.33 pekchhuah tawh niin Sawrkar laipui chuan tunhnaiah connection nuai 25 a pe chhuak leh dawn tih sawiin, heng pekchhuah thar zingah Mizoram atanga a tam thei ang ber an tel theih nan a rang lama inziahluh vat a pawimawh thu an sawi a ni.

PMUY hnuaiah hian Mizoram-ah Gas connection 36,031 pekchhuah tawh a ni a, heng zingah hian Mamit District-ah tam berin connection 7462 pekchhuah a ni tawh a, Aizawl District in dawtin connection 6818 pek a ni tawh a, Lunglei District-ah 4358 leh Kolasib District-ah connection 4524 pekchhuah a ni a, Lawngtlai District-ah 3850, Champhai District-ah 2187 leh Serchhip District-ah 1891 pekchhuah niin Hnahthial District-ah 1825, Saitual District-ah 1225 leh Khawzawl District-ah connection 1051 pekchhuah a ni tawh bawk.

PMUY hnuaiah hian chhungkaw khawsak harsa, LPS connection la nei ve lo te hnenah chhungkuaa hmeichhe kum tling hmingin a thlawna Gas connection pekchhuah thin a ni a, dil tur chuan LPG Distributor-ah emaw, online-in pmuy.gov.in-ah emaw, Common Service Centre hnai berah emaw ngaihven theih a ni ang.