Mizoram Universal Healthcare Scheme hnuaiah damlo enkawlna bill cheng nuai 8,405 pek a ni tawh

Mizoram sawrkar chuan Mizoram Universal Healthcare Scheme (MUHCS) hmangtu damlo te damdawi In-a an inenkawlna senso atan MUHCS kalpuitu damdawi In te hnenah damlo an enkawlna bill cheng nuai 8,405 a pe tawh a, Vawiin lam hian sum engemaw zat pekchhuah leh tum a ni bawk.
Mipui ten damdawi In-a a thlawna inenkawlna an dawn theihna tura kumin April thla atanga Mizoram sawrkar in Mizoram Universal Healthcare Scheme (MUHCS) a kalpui chungchanga Mizoram State Healthcare Society (MSHCS) atanga Akashvani News Aizawl thudawn danin he ruahmanna kalpui tan, April 2025 atanga thla liamta, November 28, 2025 thleng khan MUHCS kalpuitu damdawi In te hnenah damlo enkawlna senso hi pek chhoh zel a ni a, he ruahmanna kalpui a nih atanga Bill an pek tawh zawng zawng chu a vaiin cheng nuai 8,405 niin heng hi MUHCS kalpuina damdawi In hrang hranga damlo 54,261-te enkawlna bill a ni a. Vawiin hian MSHCS hian damdawi In te hnenah damlo enkawlna bill pek leh tumin nimin thleng khan buaipui a ni bawk.

Mizoram chhungah MUHCS kalpuitu Empanelled Private Hospital 13 leh Empanelled Private Day Care Centre pathum a awm mek a, heng bakah hian Mizoram pawnah Empanelled Hospital 25 leh Deemed Empanelled Hospital 13 a awm mek bawk a, heng bakah hian Mizoram chhunga sawrkar damdawi In zawng zawngah MUHCS hi hman a ni bawk.

Kumin July thla khan damlo 10,652 bill atan MUHCS kalpuitu damdawi In te hnenah cheng nuai 1,496 pek niin sum pek tam ber thla a ni a; April thla khan damlo bill 1,548 atan cheng nuai 109 pek niin a tlem ber tum a ni bawk.

MUHCS-ah hian kum 2025-26 atan sawrkar hnathawk chhungkaw 36,324, Civil Pensioner chhungkaw 8,733 leh AB PM-JAY Golden Card nei chhungkaw 2,20,463 leh a hranpaa pawisa chawia inziaklut (Contributory) chhungkaw 20,136 an awm a; CSS leh Grant-In-Aid (GIA) hnuaia thawk inziaklut zat erawh hriat theih a la ni lo thung.