Serchhip District-in ‘Best Performing District’ a lawmman pahnihna a dawn lawmna neih a ni

Kumin-a 8th Rashtriya Poshan Maah (National Nutrition Month) 2025 hman zawh taka Serchhip District in ‘Best Performing District’ a lawmman pahnihna a dawn lawmna chu nimin khan Sub-Hqrs. YMA Hall, Serchhip-ah neih a ni a, District Bawrhsap Paul L. Khuma chuan he hun hi khuallian niin a hmanpui a ni.
Serchhip District in he lawmman a dawn lawmna hunah hian Bawrhsap Paul L. Khuma chuan intihsiakna hrang hrangah lawmman lak a harsat thin thu sawiin, Mizoram puma District hrang hrang ten Rashtriya Poshan Maah 2025 puala inelna an neih ah Serchhip District in lawmman hlu tak a dawng chu lawmawm a tih thu leh he lawmman kan lak hian he hmalakna a thawktute hnathawh a ti langchiang hle tih a sawi a. Serchhip District tana theihtawp chhuah zel tur leh nu leh naupang ten hmalam hun eng zawk an neih theihna tura theihtawp chhuah zel a, an kawng atana lo eng zual zel turin a chah a ni.

Serchhip District Bawrhsap chuan he huna kalkhawmte chu nu te pawimawhna hre reng tura chahin, chutihrual chuan nu te pawhin an pawimawhna an hriat reng a tul thu a sawi bawk a, chhungkua leh an fa te tan nun hrisel an neih reng theihna turin eitur chungchang ah te, taksa sawizawi te ngai pawimawh thin turin a chah bawk a. Taksa hrisel kan neih theihna tura kan mawhphurhna kan hriat reng a tul thu a sawi bawk a ni.

Nimin-a he hun hman ah hian Women and Child Development Department-a Joint Director leh Serchhip DPO mawhphurhna la mektu Sailopari chuan kum 2018 atang khan kumtin Rashtriya Poshan Maah hi hman thin a nih thu leh kumin a Rashtriya Poshan Maah-ah hian District hrang hrang leh ICDS Project ten ngaihtuahna tha tak tak an neih te phochhuah a nih theih nan inelna an buatsaih thu a sawi a, chu inelna ah chuan Serchhip District in lawmman pahnihna lain a lawmna hi an buatsaih tih a sawi bawk.

Nimin-a he hun hman ah hian James Lalremliana, District Coordinator, Poshan Abhyan leh Lalvensanga, District Mission Coordinator, Mission Shakti te bakah District Child Protection Unit, Mission Vatsalya leh Serchhip leh East Lungdar ICDS Project te atangin an hmalakna hrang hrang ngaihthlak a ni a. Kumin a Rashtriya Poshan Maah hman chhunga inelna hrang hrang an buatsaiha tithate hnenah lawmman semna hun hman a ni bawk.