Mizoram Larsap hlui boral

Mizoram Larsap hlui leh Senior Advocate ni bawk, Swaraj Kaushal chu nimin khan kum 73 mi niin a thi a, Swaraj Kaushal hi Union Minister hlui Sushma Swaraj pasal a ni.

Nimin a boral Swaraj Kausha hi July 12, 1952 khan Solan-ah a piang a, kum 1990 khan kum 37 mi niin Mizoram Governor hna chelh tura ruat a ni a, February 8, 1990 atanga February 9, 1993 chhung khan he hna hi a thawk a, Mizoram Governor a nih hian kum 37 mi chauh niin India rama Governor naupang ber a ni a. Mizoram leh Mizo mipuite ngaina em emtu a ni.

A boral thu hriat a nih veleh Mizoram Governor leh Chief Minister te chuan sunna thu an chhuah nghal a. Mizoram Governor General (Dr) Vijay Kumar Singh chuan Instagram kaltlangin, “Mizoram Governor hlui Pu Swaraj Kaushal-a'n min boralsan thu ka hriatin min thawng hle a, pawi ka ti takzet a ni. A chhungte ka tawrhpui takzet a. Mizoram chuan a chhungte tawrhna a tawmpui a, Pu Swaraj Kaushal-a hnuhma ropui tak hi a zah sak reng ang,” a ti a. Chief Minister Lalduhoma pawhin X (Twitter) kaltlangin a sun thu a tarlang a. “Mizoram Governor hlui Pu Swaraj Kaushal-a'n min boralsan hi pawi ka ti takzet. Mipui rawng a bawlna leh Mizoram tana a lo thawh tawhna te chu zahna nen kan hre reng tawh ang. A chhungte leh a thiante hnenah ka tawrhpuina ka hlan a, thlamuang takin chawl rawh se,” a ti a ni.