Mizoram Cricket Team ten Vawiin-ah Final an khel dawn

Mizoram Cricket Team chuan Syed Mushtaq Ali Trophy Plate-ah Final lutin Vawiin hian Final an khel dawn. Pune (Maharashtra)-a MCA Cricket Stadium-a Syed Mushtaq Ali Trophy Plate Group inelna neih mekah hian Mizoram hian an match hnuhnung berah Meghalaya chu hnehin Final an lut a, vawiin tlai tlar 4:30-ah Final khelin Sikkim an hmachhawn dawn a ni.

Syed Mushtaq Ali Trophy hi India rama Cricket-a thuneitu sang, Board of Control for Cricket in India (BCCI)-in a hnuaia State/Association Mipa Senior Team-te Twenty20-a an inelna a buatsaih a ni a. Plate-a Champion hian Season tharah a thiam rual inelna, Elite an kai dawn a, Mizoram hian inelna sang zawk hmachhawn thei turin hun remchang an nei thei dawn a ni.

Tun tuma inelna hi November 26 atang khan khelh niin Mizoram Team hian an match hmasa berah Nagaland chu run 16 in an hneh a, match hnihna ah Sikkim hmachhawnin Wicket 7 in an tlawm thung a, match thumna ah Manipur chu run 31 a hneh lehin Arunachal Pradesh pawh run 58 in an hneh a, an match hnuhnung berah Meghalaya chu Wicket 8 a hnehin Group-a Team ruk awmah vawi khat tlawma vawi li chakin pahnihna an ni a, Final hi an lut a. Final-ah hian an hnehlo awm-chhun Sikkim an hmachhawn dawn a ni.