Mizoram Catholic Kohhran Centenary kharna nei

Mizoram Catholic Kohhran in kum 100 a tlin lawmna kum khat chhung an neih kharna Inkhawm chu nimin khan Mizoram Larsap General (Dr) Vijay Kumar Sing leh Chief Minister Lalduhoma ten an telpui.

Aizawl Ramthar Veng Bishop's House Compound-a Mizoram Catholic Kohhrankum 100 tlin lawmna kharna hun nimin-a neih ah hian Larsap General (Dr) Vijay Kumar Singh chuan Mizoram Catholic Kohhran in kum 100 hmel a hmu ta chu lawmawm a tih thu leh Mellung pawimawh tak a nih thu a sawi a. Kum 100 chuang kaltaa chanchintha kenga Mizorama lo kal Missionary te'n Pathian thu mai ni lo, zirna, hriselna leh khawtlang nun chawikanna an rawn kentel thu sawiin, hemi rahchhuah hi tunah chuan hmuh theihin a awm mek tih a sawi a, “Kan inpumkhatna, ralmuanna leh inngaihsaktawnna te hi mite'n Mizoram an ngaihsanna chhhan a ni,” a ti bawk. Larsap chuan Catholic Kohhranin Mizoram khawtlang nun, rinna leh ngaihtuahna siam dik kawngah a thawh hlawk hle tih pawh sawiin, vantlang rawngbawlna, hriselna, zirna leh Kohhran dang nena inremna leh thalaite tihhmasawn kawnga an hmalaknate fakawm a tih thu a sawi a. Mizoram Catholic Kohhran member-te chu kum 100 dang lo la awm tur thlir chunga inpekna nena rawngbawlna chhunzawm tura chahin, thalaite nun kawng dika hruai tura kaihhruaina tha pe turte, tunlai thiamnate hmang tangkai deuh deuh turte, muanna leh inpumkhatnate chawilar zel tur leh mirethei leh hnuaihnungte rawngbawl sak kawnga inpekna thar nei turte in a chah a ni.

He hunah hian Chief Minister Lalduhoma pawhin Mizoram Catholic Kohhran leh mipui zawng zawngte Centenary chibai bukin, “Catholic Kohhran avangin Mizoram in sawrkar din ni lo High School hmasa ber St. Paul's High School kan nei a, zirna In tha tak tak dang tam tak kan nei zui zel a, Vawiin ah chuan hengte Mizorama School tha ber ber an ni hlawm a, India rama zirna School tha ber berte hi he Kohhran enkawlte an ni,” a ti a. Mirethei leh chanhaite chhawmdawlna kawnga Catholic Kohhran hmalakna fakawm a tih thu sawiin, Mizoram-ah pawh Zoram Entu Pawl (ZEP) kaltlanga hna ropui tak tak an thawh thin thu a sawi a. Catholic Kohhran member Mizo hnam tana mi hlu tak takte chanchin tarlangin, ram hruaitu leh mi hmingtha tam tak an chherchhuah thu a sawi a. Mizoram tana hna ropui tak tak an thawh avangin an chungah State mipui aiawhin lawmthu a sawi bawk a ni.

Mizoram Catholic Kohhran hi February 1, 1925 khan din a ni a, tun dinhmunah member 20,000 chuang an awm a. Kum 100 an tlin lawmna hi kawng hrang hranga buatsaih niin a kharna Inkhawm hi ni thum chhung neih a ni a, sawrkar mi pawimawh te bakah State pawnlam-a an Kohhran hruaitu thahnem takin an rawn hmanpui bawk a ni.