Health insurance a tel tih sawi

Labour, Employment, Skill Development (LESDE) and Entrepreneurship Department Director John Tanpuia chuan kuthnathawktute dan thar Labour Code hnuaia hnathawka mi chhawrtu ten hriselna lam kaihhnawih Health Insurance engemaw chen an tumsak tur anih bakah hnathawktute dinhmun chawikanna tur a awm nual tih a sawi a, mi tupawh mimal dawr emaw thil siamchhuahna hmun nei emaw chuan an hnathawkte Appointment Letter felfai tak an pek ve a ngaih tawh dawn thu a sawi a. Kum khata ni 180 thawk chin te chu hlawh kiam chuang lova chawlh (paid leave) an neih theihna tur te, hmeichhia leh mipa hlawh inang te, zan lama hmeichhia te hna an thawh theihna tur te leh hriselna kawnga a chhawrtute mawhphurhna hrang hrang Labour Code tharah a tel tih a sawi bawk.

LESDE Director John Tanpuia chuan ram pum huapin hnathawktuten dan thar chu an thatpui a rin thu sawiin, India ramin kum 2047-a ram intodelh leh ei leh bara hmasawn ber te zinga tel a tum mekah pawh he dan thar hi thil pawimawh ber te zinga mi a nih dawn thu a sawi a. Mizoram-ah pawh hmathlir nei rana he danin a huam theih tur hnathawktu an lo pun belh zel theih nan sawrkar hna chauh ni lo, industry tam zawk neih kawngah pawh ngaihtuahna sen tul a tih thu a sawi a ni.