Khawlailung Bunghmun Branch YMA Hall sak thar hawn a ni

Khawlailung Bunghmun Branch YMA Hall sak thar chu Inrinni khan Serchhip DRDO Project Director Dr. Malsawmtluanga Fanchun chuan a hawng.
YMA Hall thar hawnna hun Branch YMA President Ziakhmingthanga kaihhruaia neih ah Dr. Malsawmtluanga Fanchun chuan YMA chu kan Hnam rohlu vawngtu an nih bakah danglamna thlen theitu an nihna hre rengin khawvel danglam zelah zirtirna dik leh a tha zawnga khawtlang thlaktu ni tura theihtawp chhuah turin a chah a. Social Media-ah aia upa zahna a tlahniam hle nia sawiin, Social Media hman kawngah chhungkua atanga inzirtirna tha kan neih a tul bakah YMA pawh in hmalak a tul thu sawiin, khawtlang nun nuam kan neih theih nan thuawihna kan neih a pawimawh thu a sawi bawk.

Khawlailung Bunghmun Branch YMA Hall sa tur hian July 1, 2019 khan lungphum phumin MLA Fund cheng nuai khat leh RURBAN atanga sum hmun cheng nuai khat hmangin bultan a ni a, kum 2023 khan Social Welfare & Tribal Affairs Department atangin Article 275(1) hnuaiah cheng nuai 42.4 hmuin Hall hi sak puitlin a ni ta a ni.