Serchhip-ah Food Licensing & Registration Drive neih a ni

Health & Family Welfare Department-a Food & Drugs Administration hnuaia Food Safety Section chuan tun thla ni 5 atang khan Serchhip District chhunga khaw hrang hrangah Food Licensing & Registration Drive neiin nimin khan Serchhip-ah zawhfel a ni.

Food Licensing & Registration Drive hi tun thla ni 5 khan Serchhip District-ah tan niin Khumgtung khua ah bultan a ni a, hemi hnu hian Chhiahtlang leh Thenzawl-ah te chhunzawm lehin nimin khan Serchhip CMO Conference Hall ah chhunzawma zawhfel a ni a, Serchhip-a FDA Asst. Director Sarah Laldintluangi chuan Food Safety & Standards Act, 2006 in a phut angin ei leh in hmanga sumdawng zawng zawng te chu an sumdawnna a zirin Registration emaw, License emaw neih vek tur a nih thu sawiin. Registration emaw License emaw nei lova sumdawnna lo kalpui te chu FSS Act, 2006 Sec 63 hmanga hrem theih an nih thu leh cheng nuai 10 thlenga chawi theih a nih thu a sawi a. Dan zawm chu mipui te tih makmawh a nih thu sawiin, ei leh in hmanga sumdawng te chuan heng Registration emaw License emaw hi tivek turin an hriattir bawk a ni.

Hei bakah hian Sarah Laldintluangi chuan Food Licensing & Registration Drive an neih zawh hnuah pawh hian ei leh in lama sumdawng license emaw, registration la ti ve lo te tan Office kai ni apiangin FDA Section, CMO Office, Serchhip-ah document ngai te kengin a tih theih thu a sawi a. Kum khat atan Rs. 100 zel chawi a tul thu pawh a sawi bawk a. FSS Act, 2006 hnuaiah hian dan hrang hrang zawm tur a awm thu pawh sawiin, “Kan thil zawrh te en fimkhur ila, eitur thi tawh (Expired products) te chu zuarchhuak lo turin kan in ngen bawk a. Ei leh in tur expire tawh zuar a hralh te chu FSS Act, 2005 Section 50, Section 55 leh Section 59 hmang ten hrem theih an ni,” a ti a ni.

Nimin-a Food Licensing & Registration Drive-ah hian Serchhip-a ei leh in lama sumdawng thahnem tak an inziaklut a ni