Nov. 19, 2025 khian Serchhip-ah ‘Sardar @150 Unity March’ neih a ni dawn

Serchhip District Bawrhsap Paul L. Khuma chuan nimin khan Serchhip-a thuthar thehdarhtute kawmin tun thla ni 19-a Serchhip-a ‘Sardar @150 Unity March’ neih tur chungchang a hrilhfiah.
Serchhip DC Meeting Hall-a thuthar thehdarhtute a kawmna ah hian Bawrhsap Paul L. Khuma chuan ramchhungah Sardar Valabhai Patel-a pianchampha vawi 150-na denchhen hian hmalakna kawng hrang hrang kalpui a nih thu sawiin, Sardar @150 Unity March pawh hi Sardar Valabhai Patel pian champhaphak vawi 150-na denchhena neih a nih tur thu a sawi a. He hmalakna hi Nehru Yuva Kendra Sangathan tia hriat thin, Mera Yuva Bharat (MY Bharat) ten an buaipui thu sawiin, India ram chu hnam hrang hrang, tawng hrang hrang hmang leh Sakhua in ang lo tak tak awmkhawm kan nih thu sawiin, India ram hi kan hmangaih a, culture in ang lo tak tak ten inunauna leh inpumkhatna kan neih theihna turin he Ni hi hman thin a nih thu a sawi a ni,

Serchhip District Bawrhsap chuan Serchhip khawpuiah chuan November ni 19, 2025 chawhnu dar 1:00-ah Unity March hi neih tum a nih thu sawiin, Govt. Higher Secondary School Serchhip tual-ah Serchhip SP, Gavit Gogna IPS kaihhruaiin a bultanna hun hman a ni anga, heta tang hian Serchhip P&E Veng-a Leisekawt Mual kaltlangin Serchhip DC Office thlengin kawng hi zawh tur a nih thu leh a tawpna hi Bawrhsap hova hman tur a nih thu a sawi a. Kawngzawh pah hian Faina chungchang inzirtirna leh bawlhhlawh chhar khawmna hun hmangin Leisekawt Mual-a hun hman tur a nih thu leh heng hun hmanna hrang hrang ah te hian Hnam Lam te entir tur a nih thu a sawi bawk a ni.

Unity March-ah hian zirlai naupang te, College zirlai leh sawrkar hnathawk tel tura beisei niin mi 500 vel tel tura beisei an ni a, heng bakah hian Serchhip mipui a thei apiang tel turin a sawm bawk a. Serchhip District chhunga Thenzawl Civil Sub-Division ah pawh he hun hmang tura ruahman a nih thu a sawi bawk a ni.

Sardar Valabhai Patel hi ‘Iron Man of India’ tia vuah niin India ram inpumkhatna atana mi pawimawh a ni a. British awp behna ata India ramin zalenna a hmuh khan India ram bung hrang hrang te chu Princely State-a awmin, lal tam tak hnuaiah an kun a. Heng Princely State 500 chuang zet awm te hi Indian Union a tel turin sawm leh lakluh an ni a. Tuna India ram hi a lo pian theihna tura thawhhlawk ber chu Sardar Valabhai Patel hi a nih avangin a pian champha hi National Unity Day atan kumtin hman thin a ni.