Non-Notified Forest Area chungchang sawiho a ni

Serchhip District chhunga Non-Notified Forest Area (NNTFA) chungchanga hmalak zel dan tur ngaihtuahin nimin khan Serchhip-ah District Level Committee thutkhawm neih a ni.
Serchhip DC Meeting Hall-a thutkhawm hi Bawrhsap Paul L. Khuma chuan kaihruaiin Serchhip District chhunga NNTFA Supreme Court of India hnena 1997-a Affidavit file tawh te chu Lungrang Tlang (Thenzawl East VC), Lungreng Tlang (Lungkawlh VC) leh Lungpho Ngaw (Lungpho VC) te an ni a. NNTF Area atanga paih chu State Level Expert Committee in rem a tih loh avangin a ramri leh a zau zawngte mumal zawka teh tha lehin State Expert Committee ah thehluh nise an ti a. Tun dinhmuna Serchhip District chhunga NNTF Area thar tura rawtna lut zingah Bawk-tlang-a Lalvunga Hmun liam leh East Lungdar-a Khurthar Chung te chu pawm a ni a. Rawtna lut zingah North Vanlaiphai ram erawh ruahmanna dang a lo awm tawh avangin telh loh mai nise, Expert Committee-ah ziak thlen nise an ti a. Lungpho VC huamchhunga awm Ziakna puk pawh RO te leh khawtlang hruaituten lo a ram chung-chang sawiho leh se an ti bawk.

Serchhip District chhung sawrkar reserve pawna sawrkarin thingphunna a lo neih te chu record felfai taka siam tura ruahman a ni bawk a. Heng sawrkar Plantation te hi Forest Area zingah rinluh vek tur an ni.  District Level Committee chuan heng record te hi November ni 29 ralhmain State Level Expert Committee-ah hriattir tura tih an ni a. Record siam a nih theih nan Stakeholders - VC leh mi pawimawh dang te nena sawiho hmasak nise an ti bawk.

Nimin-a thutkhawm ah hian EF&CC Department, Revenue, DLAO, Sub-Hqrs. YMA, Neihloh Branch YMA, Joint VC Serchhip bakah Thenzawl East, Lungpho, Lungkawlh, North Vanlaiphai, Leng, East Lungdar leh Bawktlang VC te an tel a ni.